Bun ki ban kynthoh ïa ngi ban ïalam bakla hynrei long kiba sian bad kiba peitngor: Ardent

Nongstoiñ, Jylliew 11: U President ka Voice of the People Party (VPP) u Bah Ardent Basaïawmoit ha ka sngi Saitjaiñ u la kyntu ïa ki paidbah nongkyrshan bad ki nongtrei ba dang shu pynïasoh thymmai sha ka party ba kin long kiba husiar bad kiba peitngor ïa ka jingïalam bakla kaba kiwei ki party kin pyrshang ban pynsngewthuh bakla ïa ki sienjam ki nongïalam bad ka party.
Haba kren ha ka jingïalang pynrung dkhot sha ka VPP ha Mount Calvary Parish Hall Rambrai, u Bah Ardent u la ong ba ka jingïoh jingkyrshan ka VPP na ki paidbah ha kylleng ki bynta ka ri ka la pynlong ïa kiwei ki party ban tieng bad ban duhthiah duh dem namar ki sngewthuh ba u paidbah u la phai khamt sha ka VPP hadien ba ki la ïohi ïa ki kam bad ki nongrim kiba ka party ka ïeng.
“Ki nongkyrshan ka Congress kin ym ïaroh ïa ngi, ki nongkyrshan ka NPP kin kynnoh lai phew jait, ki nongkyrshan ka UDP bad HSPDP bad kiwei ki party dalei lei kin ym ïaroh lada ngi leh da kano kano ka kam watla ka dei kaba dei eh hynrei kin kyntoh beit ban ïalam bakla hynrei ka shong ha phi ba phi da pyrkhat sian ïa ka jingïalam bakla jong ki ym ban shu ngeit kat ïa kaba ki ong namar ki te kin pyrshang beit ban ïalam bakla,” u la ong.
“Haba don ki jingkren kiba phi sngew artatien kum ki paidbah kiba peitngor phi don hok ban pan jingshai ym ban shu ngeit kat ïa kaba ong kiwei namar ngi la ïoh katne ka jingieid na u paidbah ngin ym lah ban shim sting ïa kane ka jingshniah kiba u paidbah ka ri u la ai ïa ngi,” u la bynrap.
U la kyntu ruh ba kito kiba pynïasnoh sha ka VPP ba ki dei ban ïasnoh da ka jingthmu ban shakri ïa ka jaidbynriew ym ban khmih lynti ïoh kam kontrak ne kino kino ki kam ban myntoi shimet.
“Haba phi pynïasnoh sha ka VPP wat ïasnoh tangba beh ka lyer jingjop hynrei ïasnoh ban poynkhlaiñ ban pynthikna ba ngin lah ban jop bad long ruh kiba kshem ha ka nongrim bad wat shah thied,” u la kyntu.
Ha kane ka sngi la sakhi ba da ki spah ngut ki paidbah ki la pynïasnoh sha ka VPP ba kynthup naduh ki longkmie long kpa bad ki samla.
Lah ban ïohi ruh ia shi kynhun ki nongrep kiba dang puh pynthor kiba shu hylla na jaka ba ki dang trei ha ka por ba u Bah Ardent u dang mut ban leit sha Rambrai hynrei la ïohi ba ki la ap lupa ha surok ban ai khublei ïa u ynda u la mut ban leit phai sha Shillong hadien ka jingïalang ryngakt ka jingkitbok ïa u bad ïa ka VPP.