Shillong, Jylliew, 28: Ka jingdonkam kyrkieh ban ïada ïa ki sawdong sawkun jong ka mei mariang bad ïa ki mrad ki mreng kiba im ha pneh ka mei rawew, ka Meghalaya State Judicial Academy, WWF-India and TRAFFIC India ha ka sngi Saitjaiñ ka la pynlong ïa ka jingïathir ïatai halor ka mat ban ïada ïa ki khlaw bad ïa ki mraw khlaw na ka bynta ki riewsaid aiñ ka jylla Meghalaya da kaba ïatreilang bad ka WWF-India bad ka TRAFFIC India.
Ha kane ka jingïathir nia kaba la long ha Conference Hall, Meghalaya High Court, Shillong la sakhi lang da u Chief Justice jong ka Iingbishar Meghalaya High Court u Justice Sanjib Banerjee.
Haba kren kum u Khlieh jong ka Iingbishar Meghalaya High Court u la ong watla ki bun ki aiñ kiba la shna ban ïada ïa ki khlaw ki btap bad ban ïada ïa ki mrad ki mreng hynrei ka rukom pyntreikam ka synjor haduh katta katta.
“Ka pyrthei ka la don lypa palat 4 billion snem bad u khun bynriew u la don kumba 300,000 snem, hynrei u khun bynriew u la long u nongpynjot palat 3 million ki jait mrad ban pynhun ïa ka jingkwah lajong,” u la ong.
Da kaba kdew ba donkam ban kyntiew ïa ki jngohkai pyrthei ha Meghalaya u la banjur ba dei ban don ïa ki thong bad ki mat treikam khnang ba ka karkhana jngohkai pyrthei kan long kaba pynneh ïa ka jingitynnat jong ka Meghalaya khlem da pynjot pynpra kumba la jia ha kiwei pat ki jylla rilum jong ka Ri.
“Ki kam pynsniew jong u khun bynriew ki long kum ka jingpang bampong ïa kane ka pyrthei metbneng,’ u la ong.
“Ngim lah ban ïakhun bad ka mariang bad ban im,” ong u Justice Banerjee bad banjur ba donkam ban pynneh pynsah ïa ka mei mariang bad bynrpa ruh ba ka Ingbishar ka la noh synñiang halor kane da kaba pynmih bun tylli ki rai kiba ïadei bad ka jingïada ïa ka mei mariang bad ïa ki mrad khlaw bad kdew ruh ïa ka jingdonkam jong ki aiñ ban ïada ïa ka mariang.
