Bun bha ka jinglut ban pyndait ïa ka skim bording ha Meghalaya, donkam ban kyntiew shuh : Myntri

Shillong, Naiwieng 03 : U Myntri ka tnad bording u Bah Metbah Lyngdoh u la kyntu ïa ka sorkar pdeng ban bishar biang ïa ka jinglut jingsep na ka bynta ki skhim solar da kaba kdew ïa ka jinglut jingsep kaba kham heh ha ki jaka lum jong ka Meghalaya.
Haba kren sha ki lad pathai khubor ha ka sngi Nyngkong, u Bah Metbah u la pyntip ba u la rah ïa kane ka mat ha ka jingïalang kaba dang shen kaba la pynïaid da u Myntri ka tnad Bording ka sorkar pdeng kaba long ha Guwahati, Assam.
U la pynpaw ïa ka jingbym ïahap hapdeng ka jinglut jingsep jong ka sorkar pdeng kaba long 55,000 tyngka na ka bynta 1 KW katba lada khein pat ïa ka jingpynlut kaba shisha kan kot sha ka 80,000 – 85,000 tyngka na bynta ka 1KW ha Meghalaya. “Kane ka la pynlong ïa ka jingduna ka jingshim ïa ka skhim PM-KUSUM, wat hapdeng ka jingpyrshang jong ka jylla ban pynkiew ïa ka jingïarap sha ka 45%,” u la ong.
U Myntri u la ban jur ba ki jinglut jingsep ba mynta kim ïahap bad ka jinglong ka jaka ha ka jylla, da kaba ong, “Kane kam shym la pynshlur ne pynmynjur ïa ki nongïoh jingmyntoi ban wan shakhmat ban ïoh jingmyntoi na kane ka skhim.”
Ka Meghalaya ka pyndait shuh palat 2000 tylli ki solar pump bad mynta ka dang pan ban pynkiew shuh ka jingmang ban kyntiew ïa ka jingpyndonkam ïa kane ka skim ban ring bording na ka sngi.
“Kane ka dei kawei na ki skhim kaba paka bha na ka sorkar pdeng. Kumta ngi kyrmen ban pynbiang ïa kane namar ka dei kawei na ki lad ban ïoh bording kaba biang ,” u la bynrap.