Buh thong ka Sorkar Meghalaya ban pynioh biang ia ka Block-I bad II sha Meghalaya

Shillong, Jylliew, 23: Ka Regional Committee na ka bynta ka Ribhoi District ïa kaba la khlieh da u Symbud Myntri Rangbah Bah Prestone Tynsong kum u Chairman ka la rai ban ïakynduh bad ka Regional Committee na ka jylla Assam ha u bnai Naitung, 2023 ban ïathir ïatai sani ha kaba ïadei bad ka jingpynbeit ïa ki jaka kiba don hapdeng ka jingïakajia pud ha khappud ka Jylla Assam bad ka them Ribhoi, kaba dang hap hapoh ka Jylla Meghalaya.
Ha ka jingïakren bad ki lad pathai khubor, u Bah Prestone Tynsong, u la ong ba ka jingïalang ka la ïakren ïa ki shnong kiba don ha ka jingïakajia pud, kata, ha ka shnong Deshdomrea, Borduar, Nongwah-Mawtamur bad ha ka thain Block-2.
Haba kylli, u Bah Prestone u la ïathuh ba ki kyndon ïakren jong ka Regional Committee ki dei hi kijuh kumba la long ha ka jingïakren pynbeit pud ha ka wat kaba nyngkong.
“Ngi la ïakren ruh halor ka jingdawa jong ki paidbah jong ka thain Block-2 ban pynphai noh ïa ki jaka sha ka Jylla Meghalaya. Ngi don ïa ki dulir bad ngin sa ïakren,” u la ong.
U la ong ruh ba ka jingkylli halor ka jingmih ki jingïakajia pud ha ka thaiñ Block-1 bad Block-2 kam don satia hynrei ka jingdawa ka long ban pynïoh biang ïa kine ki jaka katkum ka Notification ba la pynmih ha u snem 1951 ba la pynmih da ka Sorkar Assam.
“Ka jingïakren jong ngi ïa ka Block-1 bad Block-2 ka long ba kin (Sorkar Assam) kin pynphai biang sha ka Jylla Meghalaya khamtam ïa ki shnong kiba kham bun ki nongshong shnong ki dei ki doh ki snam jong ngi,” la ong shuh shuh u Bah Prestone.