Shillong, Naitung 09: Ka Myntri ba khmih ïa ka tnat Health and Family Welfare ka Kong Ampareen Lyngdoh ha ka sngi baar ka la ïathuh ba ka National Medical Commission (NMC) shen kan sa wan jngoh ïa ka jylla hadien ba ka sorkar ka la pynpaw ba ka long kaba la kloi ban pyntreikam noh ïa ka government medical college bad ka private medical college.
Haba kren sha ki lad pathai khubor ka kong Lyngdoh ka la ong, “Ngi pyntyllun bha ïa ka kam. Ha ka jingshisha ka medical authority of India ka la shim bishar ïa ka jingshisha ba ka Meghalaya mynta ka la long kaba la khreh ban pyntreikam noh ïa kawei ka government medical college bad kawei ka private medical college.”
“Kumta ngi don ka jingïasyllok kaba ïajan bha bad ki bor badei khmih bad mynta ngi don ka jingïakren ïa kane bad ki medical association ka Meghalaya naba ïa ki ruh hap ban kynthup lang bad ngi la ïakren ruh ïa kane bad ka NEIGRIHMS naba kin ai ka jingkdew lynti bad kumjuh ruh bad baroh ki committee kiba don jingïadei bad ka jingsdang ïa ki medical college. Kumba 2 ne 3 tylli ki committee ki la don ha la ki jaka bad ngi dang peit halor kane ka bynta,” ka la ong.
Ka la pyntip ba ïa ka Shillong Medical College yn long trai da ka sorkar bad yn pyndonkam ïa ki lad jingshakri kiba don mynta ha ki hospital sorkar bad ba pynïaid da ka sorkar da kaba bynrap ba ka dei ka brown field project naba ki don ki jingtei kiba la biang ban sdang ïa ka college.
“Mynta ngin hap pynthikna ba ngi lah ban thung ïa ki professor, lecturer ha kiba bun ki tnat kiba kongsan. Ngi lah ne ngin ym lah ban don kiba la shemphang ha jylla Meghalaya kumta ngi donkam ban pynthikna ba ha ka por ba ngi sdang ïa kane ka jaka pule, kam dei ban don ka jingïapeiñ halor ka long ka man ka pule puthi,” ka la ong.
Ka la pyntip ruh ba ka sorkar ka la buh ka thong ban sdang ïa ka Shillong medical college ha u snem 2025-26.
Ka la pyntip ruh ba u Vice Chancellor ka North Eastern Hill University (NEHU) u la khot sngewbha ïa u secretary incharge health ban ïadonbynta ha ki jingdonkam bad ki rukom treikam haba ïadei bad ka jingïoh pynïasoh ne jingithuh ïa kane ka jaka pule.
“Baroh ka dei ban ïoh shwa ka jingmynjur jong ka kynhun myntri ha shwa ban shim ïa ka rai kaba khatduh. Ka don ka lad ïa ka jylla Meghalaya ban ïoh jingithuh bad pynïasoh ïa kine ki medical college sha ka NEHU ne ka state university,” ka la ong.
