Buh thong ka sorkar ban buh ki Rehabilatation Centre ha manla ki distrik ban sumar ïa kiba dih drok

Shillong, Jymmang 31: U Mission Director of Drug Reduction, Elimination, and Action Mission (DREAM) u Bah Francis Kharshiing u la ong ba ka sorkar ka buh ïa ka thong ban buh ïa ki rehabilitation centre na ka bynta ban ai ki lad jingsumar ïa kiba la kyrni ha ka jingdih ïa u drok ha manla ki district shisien ba la dep ban soi ïa ka memorandum of understanding (MoU) bad ka Kerala Psychiatric Society (KPS) khnang ban lah ban pynbeit ïa ki jingduna ka jingdon ki psychiatrist ha ka jylla.
Haba kren sha ki lad pathai khubor u Bah Kharshiing u la ong, “Ngi la buh ka thong ban plie ïa kiba bun ki rehabilitation centre ha manla ki district, lada ym lah ban buh bun hynrei la kumno kumno kawei dei ban don. Ngi la buh ruh ka thong ban plie ïa ka detox centre ha manla ki district. Kumba long mynta ngi don tang 2 tylli ki detox centre ba la pynïaid da ka sorkar. Ki don ruh ki private detox centre hynrei hap pat ban siew. Kumta ka sorkar ka sngewkhia ïa ki longïing kiba tlot ka ïoh ka kot bad ki BPL. Kumta ka sorkar ka angnud ban don ïa ka detox centre ha manla ki district.”
Haba ïadei bad ka jingduna ba bun jong ka jingdon ki psychiatrist ha ka jylla, u mission director u la ong ba shen ka jingsoi ïa ka MoU kan sa urlong noh bad ka KPC na jylla Kerala.
“Kumba long mynta ngi don ka jingduna jong ki psychiatrist. Nga la dep ban ïasyllok bad ka KPC bad ha u taïew ban wan, ngin sa don ka video conference bad ki bad ha ryngkat bad principal secretary bad commissioner & secretary ngin sa don ka jingïasyllok bad shen ngin sa soi ïa ka MoU bad ki,” u la ong.
“Ka Kerala ka la pynmih ïa kumba 72 ngut ki psychiatrist ha ka shi snem ba bun na ki, ki dang wad ïa ki kam ki jam. Kumta ki long kiba la angnud ban wan bad ban trei bad ngi. Kane ka shong ruh ha ka jingïasyllok, ngin pynshlur ïa ki ban pynïasoh bad ngi. Shisien ba la pyntreikam ïa ka MoU, ngin sa sdang ban buh ïa ki detox centre ha manla ki district,” u la bynrap.
Shuh shuh u mission director u la pyntip ba shen ka sorkar kan sa buh ïa ki rehabilitation centre ha Tura, West Garo Hills. Katkum ka jingong jong u, ka Garo Hills ka dei kawei na ki thaiñ kaba la shah ktah bha ha kane ka jingdih ïa u drok.
Sa kawei ka rehabilitation centre yn sa buh ha Nongstoiñ, West Khasi Hills.
Katkum ka jingïathuh jong u, ka jingjurip na ka bynta ka jingtyrwa ban tei ïa ki building na ka bynta ban buh ïa kine ki rehabilitation centre la dep ban pynlong dangshen ruh ha Tura bad Nongstoiñ.