Buh thong ka Hima Sohra ban pynjyrngam bad pyllait ïa ka thaiñ Sohra na ka jingjaboh

Shillong, Nailur, 27: Ka Hima Sohra kaba la buh hakhmat ïa ka thong ban wanrah ïa ka jingpynjyrngam bad ka jingkhuid jingsuba ha ki jaka jngohkai pyrthei kiba don ha ka thaiñ Sohra baroh kawei, ha ka sngi Thohdieng ka la pynbna paidbah ïa ka Green and Clean Sohra Campaign.
Ha ka jingïalang kaba ka long ha ka shnong Mawkdok la ïadonlang u Myntri barim ka Sorkar Jylla uba khmih ïa ka tnat Jngohkai Pyrthei u Bah Paul Lyngdoh uba la long kum u kongsan, ryngkat ka jingdonlang jong u MLA ka Sohra u Bah Gavin Mylliem, u Syiem Khynnah ka Hima Sohra u Pa’iem Marremdor Syiem, u Advisor ka Hima Sohra u Bah Alan West Kharkongor, ka Syiem Sad jong ka Hima Sohra ka Mei’iem Costlymai Syiem bad kiwei kiwei.
Ka Hima Sohra ka la ïasoi ruh ïa ka soskular ïasngewthuh jingmut lane ka Memorandum of Understanding (MoU) bad ka Martin Luther Christian University (MLCU) ha kane ka jingïalang bad la sam ruh ïa ki syrnot sah ki dkhot jong ka Hima Sohra Tourist Assistance Team (HSTAT).
Ka jingpynbna paidbah jong ka Hima Sohra ïa kane ka pynshai paidbah ka long ruh kum shi bynta ban pynsngewthuh ïa ki nongjngohkai pyrthei ba kim dei ban bam khana ha ki jaka jngohkai pyrthei namarba ka wanrah ïa ka jingjaboh hynrei lait noh tang ha ki jaka ba la buh kyrpang, ban ym bret ïa ki jaboh na ki song plastik ha ki surok bad ha ki jaka jngohkai pyrthei, ban ym sahmiet kynhun ha ki jaka bym pat ïoh jingbit, ban shim wai da ki Tourist Guide kiba dei ki trai shnong khnang ban lait na kino kino ki jingjia ba sngewsih, bad la khang ruh ïa ki lad pathai khubor bad ïa ki Influencer ban pynbna paidbah ïa ki jaka ba lap thymmai katba ym pat ïoh ïa ka jingmynjur na ka Tourism Committee jong ka Hima Sohra.
Ka Hima Sohra ka la shon ruh da ka kot lyngkdop ba la batai bniah ïa ki adong bad ki jingbthah ïa kiba yn sam sha ki nongjngohkai pyrthei ba ki dei ban bud beit thik katkum ki kyndon ba la buh.