Rambrai, Ïaiong, 28: Ka Federation of Khasi Jaiñtia & Garo People Rambrai Circle ha ka 23.04.2022 ka la hiar sha ka Shnong Marwa, ban pynskhem ïa ka unit ka ba thymmai ha katei ka shnong, ha kaba la pynïaid ïa ka jingïalang da u bah Robert Benison Wahlang Cheif Organiser FKJGP Rambrai Circle. Katba ki nongkren lyngkot ha katei ka sngi ki kynthup u Samla Pynshai Kharbani Incharge Information secretary FKJGP West Khasi Hill, u bah Shanbor Nongphud General Secretary FKJGP Rambrai Circle, u sordar ka shnong Marwa bad kiwei kiwei.
Ki nongkren ha katei ka sngi ki la pynpaw ïa ka juh ka sur ba ka FKJGP kan long kawei na ki sengbhalang kaba ai ïa ka jingshakri ïa ka dong ka thaiñ bad ïa ka jaitbynriew. Ha kane ka sngi la pynskhem bad pyntïan smai ïa ki nongïalam ba thymmai jong ka FKJGP Marwa unit da u President ka FKJGP Rambrai Circle u Bah Jistarland Lyngkhoi.
Ki Nongïalam jong ka FKJGP Marwa Unit ki kynthup ïa u President u samla Kordorlang Syiemsad, Vice President u samla Phastar Marngar, General Secretary u samla Synjaibor Maram, Assistant Secretary u samla Bansiewdor Maram,Chief Organiser Secretary u samla Gilbert Lyngdoh bad kiwei kiwei.
Haba ai jingkren kyntu kynpham u Bah Jistarland u la pynpaw ïa ka jingkyrmen ba ki khun samla ha kylleng ka thaiñ Rambrai ki la angnud ban shakri ïa ka thaiñ Rambrai lyngba ka FKJGP. U la ong ba kum ki dkhot kiba thymmai ki dei ban long ki ba trei hok, ki ba shlur bad ki ban don ka mynsiem ïaleh na ka bynta ka jingbha jong ka dong ka thaiñ.
Kum ki samla nongïalam ka thong ba ha khmat jong ka FKJGP ka long ban ïai dawa na ka Sorkar ban ïoh noh la ka jong ka C&RD Block ha Rambrai, kumba ki paitbah jong ka thaiñ Rambrai ki la angnud la slem. U la ai mynsiem shakri kan ïai kyrsoi ha iwei pa iwei ki khun samla bad ki nongshong shnong jong ka thaiñ.
