Buh syntiew bad duwai ki paidbah ka Ri-Bhoi ha u mot sahnam u Dr. DD Lapang ha Ri-Bhoi College
Nongpoh, Nailur, 14: Ki paidbah naki kynhun bapher bapher, naduh ki skul, college, ki kynhun sengbhalang, ka Ri-Bhoi Dorbar, ki kynhun Balang, bad ki riew rangbah naka them Ri-Bhoi mynta ka step sngi u Blei kila pynlong ïaka jingduwai ba kyrpang ïaka met ba dang sah jong u nongïalam ka jylla u Dr DD Lapang bala ju tip ruh kum u Kpa ka Ri-Bhoi u ba la khlad noh haka 12 tarik mynta u bnai bad kumjuh ruh ka jingleit buh syntiew ha u mot sahnam bala tei da ka Young Minds Association ha phyllaw jong ka Ri-Bhoi College kum ka dak ka jingburom ba khatduh shuwa ka jingleit ontep ka ban long lashai ka sngi nyngkong.
Ïa katei ka jingïalang sngewlem la lam khmat da ka u MLA ka Nongpoh u Bah Mayral Born Syiem u ba dei ruh uwei naki nongïalam bala pynheh pynsan da u Dr DD Lapang, haka jingdonlang ki riew paw khmat naduh ka kong Rona Khymdeit MDC, Bah RB Shadap President ka Ri-Bhoi Dorbar, Bah Rangkynsai Makdoh, ka kong WK Blah Principal ka Alpha English Higher Secondary School, ka kong E Kharkongor Principal ka Ri-Bhoi College bad kiwei kiwei ki riew rangbah.
Na ka liang kitei ki riew pawkhmat, naduh ki riew rangbah haba kren ha katei ka sngi kila pynpaw ka jingsngewsih kthang halor ka jingduhnoh ïa u nongïalam ba radbah ka jylla bad kumjuh ruh u kpa ka Ri Bhoi District bad ka jingduh noh ïa utei u nongïalam ka long shisha ka jingduhnong kaba khraw namar u dei u diengbah u ba shan bad u ba ki paidbah ki riehtngen namar u synñiang u bynhei bad ki kam ba radbah ba utei u rangbah u la shakri ïaka jylla bad ka them Ri-Bhoi.
“Ngim lah shuh ban ïoh ïa u briew kum u Dr DD Lapang hynrei ngi khmih lynti ba ki nongïalam kin bud ïaki dienjat, bad ki jinghikai jong u, la ka long haka kam saiñ hima, ka kam shakri blei, ka jingsngewrit bad ka kam nongïalam” la pynpaw ki katto katne ki riew rangbah da kaba bynrap ruh ba kane baroh kadei ka jingpynïaid bad ka jingbuh beit jong u Blei ryngkat ki jingduwai ba ki nongïalam kin mih bujli naka them Ri-Bhoi haka jaka u Dr DD Lapang.
Ha katei ka sngi kum ki nongïalam bad ki paidbah kila phah ruh ka kyrwoh sngewlem ïa ka iing ka sem jong u Dr DD Lapang naduh ka lok, ki 2 ngut ki khun lem bad ki ksiew ryngkat ki jingduwai ba u Blei un pyntngen ïaka iing ka sem jong ki watla kila duh noh ïala u kpa u ba long u rishot bah jong ka iing ka sem.