Buh shwa ïa ka politik sharud, lehkmen shwa ïa ka Kristmas, ong u Bah Ransom ha Nongmali

Shillong, Nohprah 13 : Ka NPP Shillong North ha ka janmiet sngi Nyngkong ka la pynlong da ka jinglehkmen Kristmas bad ki 200 tylli ki longïing kiba don ha ka thaiñ Nongmali da kaba sam ïa ki nep kup syaid bad ki jingai sngewbha.
Ha katei ka jingïalang lehkmen shwa ban poi ka Kristmas, na ka liang u kyrtong ka NPP Shillong North, Bah Ransom Sutnga u la ïathuh ruh ba na ka liang ki nongïalam ka party ki la jied tang ïa ki longïing kiba kham duna ka ïoh ka kot bad ruh kiba don jingthut ha ki dkhot met kynthup ïa kito kiba la noh ka rta ban ïoh ïa kitei ki jingai sngewbha.
“Kane ka long tang kum ka dak ban ïoh lehkmen lang bad phi ki nongshong shnong ka thaiñ ha shwa ban poi ka Kristmas kaba ngi la ïoh biang ban lehkmen hadien ka jingpynthut ka khlam COVID,” u la ong.
Ha kajuh ka por, u Bah Ransom u la ong ruh ba ha kum kane ka por ba ki paidbah ki pynkhreh ïa ka jingwan ka Kristmas dei ban buh shwa ïa ka ishu politik sharud bad ban pynphuh ïa ka jinglehkmen.
Ha kane ka sngi, u Bah Ransom ryngkat ka jingtrei lang bad ka Women’s Wing hapoh ka jingïalam jong i Kong Eldora Betsy Lyngdoh ba dei ruh i kurim jong u, ki la ïathuh ba katei ka jinglehkmen bad ki longïing ba duk kan ïai bteng tad haduh ka Kristmas.
“La kumno kumno ngi kwah ban leh kmen lang bad kumba 1500 – 2000 tylli ki longïing kiba kham duna ka kamai kajih, kiba don jingthut ha ki dkhot met bad khamtam eh bad ki nongshong shnong kiba la noh ka rta,” u la ong.