Buh mawnongrim u Vice-Chancellor ka NEHU ïa ka Golden Jubilee Girls Hostel ka DDU Community College

Jowai, Nailur, 27: Kum shi bynta ban rakhe ïa ka lyngkhuh sngi kha kaba 107 jong u (L) Pandit Deen Dayal Upadhyay, u Vice Chancellor jong ka Skulbah North Eastern Hill University, Prof. P.S. Shukla, ula plie ïa u Maw Nongrim “Golden Jubilee Girls Hostel” ha Deen Dayal Upadhyay Community College for Skill Development Wahiajer, West Jaiñtia Hills District.
Kane ka prokram kala long kaba iphuh iphieng kaba la pynkhreh da ki Samla Pule jong kane ka College lyngba ki jingruwai, ki jingshad tynrai bad kiwei de ki jinglehkmen kiba pynbyrngia ïa ki heh ki haiñ jong ka NEHU, ïa ki nongpynïaid jong ka Deen Dayal Upadhyay Community for Skill Development Wahiajer bad ïa baroh ki nongshah khot sngewbha sha kane ka jingplie maw Nongrim ïa ka Golden Jubilee Girls Hostel, ha kaba u Vice Chancellor jong ka NEHU Prof. P.S. Shukla u long u kongsan.
U Professor P.S. Shukla haba kren ha kane ka sngi, u pynpaw ïa ka jingkmen ka bakhraw ha kaba kum kane ka sngi kaba kynmaw ïa ka jingrakhe sngikha jingdap shispah hynñiew snem jong u Deen Dayal Upadhyay bad kum shi bynta ban rakhe ïa kane ka sngi la lah ban plie ïa u Maw Nongrim jong ka Golden Jubilee Girls Hostel ha Deen Dayal Apadhyay Community College for Skill Development, Wahiajer West Jaiñtia Hills District, ha ka jingheh ka jaka kaba 17. 9 Acre kaba la ai sngewbha da ka shnong Wahiajer ban tei ïa ka Golden Jubilee Girls Hostel, haka jingmang tyngka kaba 7 klur tam.
U Prof. Shukla haba kren ha kane ka sngi, u ong ban tei ïa kane ka Golden Jubillee Girls Hostel ka long kaba donkam bha ba kin bit kin biang ki samla kynthei kiba pule ha kane ka Deen Dayal Community College For Skil Development.
U ong ruh ba kum u Vice Chancellor jong ka Skul bah NEHU, un pyrshang katba lah la ka buit ka bor ban thaw ki lad ki lynti ba kane ka Golden Jubilee Girls Hostel kan dep ban shna nadong shadong haka por jong u. U Prof Shukla, u pynkut ïa ka jingkren jong u da kaba kyntu ïa ki Nongshong shong shnong jong ka Wahiajer bad ia kiwei de ban ia snohkti lang na ka bynta kane ka jingthmu babha bantei ia ka Golden Jubilee Girls Hostel.
Kham hashwa la ïoh ïa ka jingkren pdiang sngewbha da ka Professor (Mrs) S.M. Sungoh, Principal Incharge Deen Dayal Upadhyay Community College for Skill Development Wahiajer ïa baroh ki nongwan sakhi ïa kane ka sngi, kaba la batai ruh ïa ka jingïaid lynti jong kane ka jaka ai jinghikai naduh la seng ïa ka ha ka snem 2017.
Nangta la ïoh ïa ka jingpynkup burom bad ka jingrewai pdiang sngewbha ïa u kongsan, ïa ki heh ki haiñ bad ïa kiba la shah khot sngewbha da ki samla pule jong ka Deen Dayal Upadhyay Community College.
Ha kane ka sngi la ïoh ruh ïa ka jingkren da u ma Sanwotki Laloo naka bynta ka shnong Wahiajer, ka jingkren kaba sngewtynnat shaphang ka jingim jong u Deen Dayal Padhyay bad ïa ka jingsdang bad ka jingmyntoi ka jingdon jong ka Deen Dayal Upadhyay Community College ha Wahiajer da u Prof. Henry Lamin (Rtd) uba long ruh u Founder Principal Incharge jong ka Deen Dayal Upadhyay Community College Wahiajer bad ka jingkren na u Shri. N.K. Bansal, Chief Engineer, CPWD, Shillong uba la batia ïa ka plan na ka bynta ban tei ïa kane ka Golden Jubilee Girls Hostel.
Ïa ki Programme la pynïaid da ka kong Wanda Lanong bad ïa ka jingkren ai khublei kyntang ïawai da u Wolnish Rymbai, Programe Coordinator, DDUCC Wahiajer.
La ïathuh ba kane ka jaka pule ka long kum ka lad kaba khraw eh ïa ki khun samla ba ïoh shibun ki lad jingpyntbit na ka bynta ban seng ïa ki kam lajong hadien ba kila dep na ka jingshah hikai, la kyntu ruh ïa ki samla ba kin long kiba minot ban pyndep ïa ki jingpule khnang ba ka lawai jong ki kan long kaba phyrnai.