Nongpoh, Lber 30: Shibynta ban kyntiew ïaka kam ïalehkai sports bad khamtam ka jinglehkai phutbol kumba la ud la nam da ki nongïalam haka thaiñ Umsning, u Myntri Rangbah ka jylla u Conrad K Sangma mynta ka sngi u la buh mawnongrim ban tei da ka Natural Football Turf ïaka madan jong ka Umsning Sports & Cultural Club kaba don ha Umsning Patarim.
Ïa katei ka madan la mang pisa haduh 4.71 klur ban pynbha nadong shadong kynthup ruh ki jaka shong, ki jaka khreh jong ki nongïalehkai bad kiwei kiwei.
Kane ka dei ka jingangnud kaba la slem jong ki nongïalam ka US&CC bad kumjuh ruh ki nongïalam shnong ka thaiñ Umsning ban ioh noh ka madan ïalehkai kaba paka bad lyngba kane ka jinggsdang kum ki nongïalam ki kyrmen skhem ba lyngba katei ka madan kan pynmih ïaki khlur ïalehkai kiba paw bad khamtam ban sei ïaka sap ka phong ki khun samla haka kam ïalehkai phutbol.
