Nongpoh, Nohprah 14: Ka Dorbar Shnong Mawtnum kum kawei na ka shnong kaba don harud ka surokbah National Highway-6 ha Ri Bhoi District, ha kane ka kynti ka la shim sa kawei pat ka sienjam na ka bynta ban shna ïa kawei na ka jaka jngohkai pyrthei ba la tip kum ‘Ka Ri Bhoi Bamboo Park’ ha kawei na ka jaka jong ka shnong kaba don harud jong katei ka surokbah.
Shwa ban jam shakhmat ban pyndep ïa katei ka jingangnud ka shnong, u Chairman ka Meghalaya Industrial Development Corporation (MIDC) u James K. Sangma mynta ka sngi u la wan ban buh ïa u mawnonrim, shwa ba ka shnong kan pynïaid ïa katei ka kam ban shna ïa katei ka Ri Bhoi Bamboo Park, kaba kin pyndonkam ban shna tang da ki siej kumba ka Ri Bhoi District, ka long ka District kaba riewspah bha ha ka jingdon bylla ki siej shnong ne ki siej khlaw.
Haba buh ïa une u mawngrim katei ka Ri Bhoi Bamboo Park la sakhi lang ruh da ka jingdon lang u Dr. Celestine Lyngdoh, MLA ka Umsning, u Bah M.B Tongper, Additional Deputy Commissioner ka Ri Bhoi, u Bah Bat-hok Nongmalieh, Rangbah Shnong ka Shnong Mawtnum, ki ophisar na ka MIDC, ki paidbah nongshong shnong bad kiwei kiwei ki riew rangbah ka Ri Bhoi.
Kum ban pynpaw, kane ka Ri Bhoi Bamboo Park ba la lam khmat da ka Shnong Mawtnum, ka dei ka jingangnud bad ka thong jong ka Dorbar shnong Mawtnum ba kan long kum kawei na ka jaka ba pynbyrngïa ne ka jaka jngohkai pyrthei, ha kaba mynta la shim khia tang da ka shnong bad ka dang donkam ruh ka jingkyrshan jong ka sorkar kumba ha kane ka sngi la sakhi da ka jingdon lang u Chairman ka MIDC u James K. Sangma uba la shim ïa ka bynta kum u kongsan.
Haba kren ruh ha kane ka sngi, na ka liang u James K. Sangma u la ai jingïaroh ïa ka Shnong Mawtnum kaba la shim ïa kane ka sienjam ban tei ïa kane ka Ri Bhoi Bamboo Park bad kane ka long kum kawei na ka nuksa ïa kiwei ki shnong ha ka jylla ba kin sngewthuh halor ka jingkordor jong ki siej kiba ngi lah ban ïoh byllai na ka jylla bad ba ngi dei ban nang ban pyndonkam ïa u siej uba lah ban pyntreikam ha baroh ki jaid kam kaba u paidbah u donkam.
U la ong ruh wat ka sorkar ka donkam kum kine ki kynja jingtrei kiba ym ktah ïa ka mariang bad kaba long ruh ka lad ai kam ai jam bad ha kawei ka bynta ban pynkiew ïa ka khajna ka sorkar bad kane ka jingthmu ka shnong Matnum ka dei kaba ngi hap ban ai jingïaroh ba lada lah ban tei ïa kane ka Bamboo Park kan kyntiew ym tang ïa ka kam jngohkai pyrthei, hynrei kan long ruh kawei na ka lad ai kam ai jam ïa ki nongshong shnong bad ruh ban kyntiew ïa ka ïoh ka kot ki nongshong shnong da ka jingwan tuid ki nongjngohkai pyrthei.
U la pynpaw ruh ba na ka liang ka sorkar lyngba ka MIDC ruh kan thaw ïa ki lad ki lynti ban ai ïa ki lad jingïarap sha kane ka Shnong khnang ba ka jingtei ïa katei ka Ri Bhoi Bamboo Park ka long shisha kaba jop bad kaba ai jingmyntoi ïa ka shnong bad ïa ki paidbah nongshong shnong hi baroh kawei.
Na ka liang u Bah Bat-hok Nongmalieh ruh kum u Rangbah shnong, u la ïathuh ba ïa kane ka Ri Bhoi Bamboo Park kaba la thmu ban shna ha katei ka jaka, ka dei ka jingangnud jong ka shnong ban thaw ïa ki lad ki lynti ban ai kam ai jam bad ruh lyngba ka jingdon kane ka Bamboo Park kan lah ruh ban khring ïa ki nongjngohkai pyrthei ha kaba kyntiew ïa ka ïoh ka kot ki paidbah bad ba ka sorkar ruh kan ruh ka lad ai kam ai jam ïa ki khun samla.
U la ïathuh ruh ba ka shnong ka la thmu ban shnaha kata ka rukom kaba itynnad bad kaba pynkhring ïa ki nongjngohkai pyrthei da kaba pyndonkam tang da ki siej bad ban poi sha kata ka thong jong ka shnong ban shna ha kata ka rukom kaba paka, ka shnong ka donkam ruh ïa ka jingkyrshan na ka sorkar.
U MLA ka Umsning u Dr. Celestine Lyngdoh ruh kum u nongmihkhmat ka Umsning Constituency, u la ai jingïaroh ïa ka shnong Mawthmu kaba thmu ban tei ïa kane ka Ri Bhoi Bamboo Park bad na ka liang jong u ruh u la kular ban thaw ïa kita ki lad ki lynti ban ïarap lang lyngba ka skhim MLA khnang ba ka jingthmu jong ka shnong Mawtnum ban pynlong ïa kane ka Ri Bhoi Bamboo Park kum kata ka jaka jngohkai pyrthei kan sa urlong bad kan sa ai jingmyntoi ruh ïa ki paidbah ka Ri Bhoi hi baroh kawei.
