Shillong, Nailur 05 : U Myntri ka tnad C&RD ka sorkar jylla Bah Hamlet Dohling ha ka sngi Nyngkong u la buh ïa u mawnongrim na ka bynta ban tei noh ïa ka ophis ba thymmai jong ka Mylliem Block ha 5Mer, Upper Shillong.
Haba kren ha ka jingïalang, u Myntri u la ong ba ki ophis Block ki long kum ka jingkieng kaba pynïasoh ïa ka sorkar bad ki paidbah, bad dei na kane ka daw ba ka sorkar ka kwah ban pynbha bad pynjanai shuh shuh ïa ka jingtreikam jong kitei ki ophis. “Ka sorkar ka la mang haduh 120 klur tyngka na ka bynta ban tei thymmai haduh 40 tylli ki ophis treikam jong ki C&RD Block ha ka jingmang kaba 3 klur tyngka kawei,” ong u Myntri. La ïathuh ruh ba ka sorkar ka la dep ruh ban shna pyndep haduh 6 tylli ki Ophis Block. U Myntri u la ai ruh ka jingïaroh ïa ka jingtrei borbah jong ka Mylliem Block na ka bynta ka jinglah ban pyntrei hok ïa ki skim la ka long kiba dei na ka sorkar pdeng ne wat haduh ki skim jong ka sorkar jylla.
Ka la don ruh ka jingai khublei khatduh ïa u Bah PT Passah BDO ka Mylliem uba la shakri ïa ka Mylliem Block la kumba 9 snem kynthih. Ha kajuh ka sngi la pdiang burom pat ïa u Bah Andrew Myrthong kum u BDO ba thymmai.
