Khliehriat, Rymphang, 02: Ka Dorbar Shnong Tuber Kmaishnong, East Jaiñtia Hills District ka la buh da ki kyndon na ka bynta ka jingïalap elekshon hapoh u pud u sam jong ka shnong Tuber Kmaishnong na ka bynta ka MDC Election 2025.
“Katkum ka Executive Committee jong ka shnong kaba la long ha 27 traik, Kyllalyngkot, ka Committee ka la rai da kawei ka sur ban tehlakam ïa ki kam sniew kiba bun rukom. Kumta ka komiti ka la buh da ki kyndon ki ban sa treikam tang hapoh ka shnong Tuber Kmaishnong kata naduh ka 3 tarik Rymphang haduh 21 Rarik rymphang,” ong u kyrwoh ba la phah da u Waheh Shnong u Bah Miki Lyngdoh.
Katkum ki kyndon la bthah ba tang ki kyrtong bad uwei u nongbud ki lah ban rung ïing na ka bynta ban pynsngewthuh sha ki longïing kiba don hapoh shnong, ym bit ban ïalam da ki briew ki bym ithuh haba rung ïing khlem ka jingtip jong ka Dorbar Shnong lait noh ki briew ba la kdew haneng (tang ki kyrtong bad uwei u nongbud).
Ha kaba ïadei bad ka jingïalap elekshon, baroh ki kyrtong ki lah ban pynlong ïalap elekhson tangba ki dei ban da bud ïa ki kyndon ba la buh da ka shnong.
“Ki kyrtong ki lah ban buh ïa ki tarik ha kano kano ka sngi, ka shnong kan ailad tang san tylli ki kali rit ban rung shapoh shnong ban pynlong ïa ka jingïalap elekshon. Ka shnong kan ailad san tang ngut ki briew ban pynsngewthuh kynthup bad u kyrtong. Ym bit shuh ban wanrah paidbah nabar shnong ha ka por ïalap elekshon namar ka jingïalap elekshon kan long beit tang ka jingpynsngewthuh ïa ki nongshong shnong. Ym bit ban tah poster lane lama ha Dorbar Shnong Community Hall, kata lada pynlong hapoh Community Hall bad ym bit ban pynlong ïa ka jingkhawai dawai hapoh ka Community Hall,” la bthah ka Dorbar Shnong.
Ka Dorbar Shnong kam khanglad ïa ka jingwan pynsngewthuh jong ki kyrtong, hynrei khnang ban dup lah ban wanrah ïa ka shongsuk shongsaiñ, ki bor pynïaid shnong ki kyrpad ïa baroh ban sngewbha ban bud ïa ki kyndon ba la kdew bad ruh kino kino ki seng saiñpyrthei ki lah ban wan pynsngewthuh ne ïalap elekshon hynrei ym bit pat ban leh tam ïa ki kyndon.
“Ka Dorbar Shnong ka kyrmen skhem ba phin ai ka jingïatreilang na ka bynta ka jingbha hapoh ka shnong jong ngi bad ruh la buh ïa kitei ki kyndon khnang ruh ban dup lah ban pynneh pynsah ïa ka khuid ka suba hapoh ka shnong ka thaw bad ruh ba ka jingïalap elekshon kan long kaba ïaid beit ïaid ryntih ha suk ka saiñ. La khang ruh ban wan ïalam ïa ki nongkyrshan kiba nabar shnong lait noh tang ïa ki trai shnong la shah ban don ha ki jingïalang ïalap elekshon,” pynkut u kyrwoh.
