Buh ka sorkar artylli ki khyrdop talasi ban khmih ïa ka koit ka khiah ki jingri, ong u Bah Hek

Shillong, Naitung 21: U Myntri ka tnat ri jingri ne Animal Husbandry and Veterinary u Bah AL Hek u la pynthikna ba ki pulit ka jylla bad ki shipai BSF ki la ïatreilang ban khanglad ïa ka kam khaïi masi beaiñ ha ki jaka bapher bapher.
Haba kren sha ki lad pathai khubor ha ka sngi nyngkong, u Bah Hek u la ong ba ki Deputy Commissioner (DC) jong baroh ki district ki dei kiba la ïoh ka bor ban pyntreikam ïa ka Prevention of Cruelty to Animal Act bad ban shim ka jingkitkhlieh ban pynsangeh ïa kine ki kam khaïi beaiñ.
U Bah Hek u la ïathuh ruh ba kito ki jingri ba la ïoh ban kurup la dep ban aiti sha ki bor pynïaid ba dei peit hadien ba la dep ban pynbeit da ki DC.
U la pynthikna ba ïa ki kam khaïi masi ba beaiñ yn sa ïasyllok bad ki DC jong ka district kaba mad ïa kane ka jingeh.
Haba ïadei bad ka jingdonkam ban phah khmih bniah ïa ka koit ka khiah jong ki jingri, u Bah Hek u la pyntip ba ka sorkar ka la buh ïa 2 tylli ki khyrdop talasi (checkgates), kawei ka don ha Ri Bhoi bad kawei pat ha Garo Hills, ba kin peitngor ïa ka koit ka khiah ki jingri kiba la wanrah sha kane ka jylla. Ka checkgate ha Ri Bhoi ka la jan dep artat ki kam jingtei, katba ki kam pat ki dang ïaid haba ïadei bad ka khyrdop talasi ha Garo Hills.
Ha kawei ka liang u Bah Hek u la kynthoh ruh halor ka jingpyrshah da ka Dorbar Shnong Mawpat, kaba la lam shah ka jingpyndam noh ïa ka jingthmu ban plie ïa ka ophis building jong ka C&RD block.
U la banjur ba ka sorkar ka angnud ban pynthikna ïa ki jingsiew bai bylla kaba rit na ka bynta ki nongtrei kaba long katkum ka aiï jong ka khyndew bad jaka.
U la ong ba ïa kane ka kam la dep ban ïakren bad ba ka sorkar ka dang trei ban pyntreikam ïa ka jingsiew bai bylla ba duna ïa ki nongtrei hapoh ki C&RD block.