Buh ka buit politik shadien, kiba dei hok ban ïoh ki dei beit ban ïoh: Kong Ampareen

Shillong, Nailur 05 : Ka MLA jong ka Shillong East, Dr. M Ampareen Lyngdoh ka la ong ba dei ban pynduh noh ïa ka mynsiem buit politik haba sam ïa kino kino ki jingïarap sha ki nong shong shnong khnang ban pyntikna ba kiba dei hok ki dei beit ban ïoh kampher la ki kyrshan ne kim kyrshan ruh.
Ïa kane ka Dr. Ampareen ka la kren ha ka jingïalang ba la lum da ka Dr. Jasmine Lyngdoh ha Nongrah ha shwa ban sam ïa ki tin sop ïing sha ki 34 tylli ki longiing kiba ka ïingsah jong ki ka la jot bad jaw lut khlem don ba ïarap lem.
“Haba ki nongïalam ki ithuh tang ïa kito ki longiing ba kyrshan ïa ki kumta ki bym kyrshan kim ïoh shuh ïa kitei ki jingïarap la ïoh tang kito kiba kyrshan. Ha ka por elekshon ka pisa ruh ki ïoh bad hadien ka elekshon ruh ki jingmyntoi baroh ki ïoh lut ma ki. Kumta nga ai jingmut ïa i Dr. Jasmine ba na bynta ka jingmyntoi jong ki nongshong shnong wat ïaid politik than. Namar hadien ba la kut ka elekshon dei ban khylliap noh ka lama bad sharai ïa ki nongshong shnong baroh,” ka la ong.
Katei ka nongmihkhmat kaba la jop haduh saw sien lynter ka la ong ruh ba kam pher la kitei kiba ïoh jingïarap ki kyrshan ne kim kyrshan ha ka por elekshon hynrei dei ban pyndep ïa ka kamram ban ïarap ïa ki. Ka ong ruh ba bunsien ki paidbah ki ïohi nongmihkhmat tang ha shwa ka elekshon hynrei baroh ki snem shaei ki jah ym tip.
Na ka liang ka Dr. Jasmine kaba dei ruh ka kyrtong jong ka NPP na Nongthymmai, ka la ïathuh ba ki don bun bha ki longiing kiba duk hynrei mynta ki hap ban ai lang mar khyndiat khyndiat ïa kitei ki tin sop ba ki pynïoh lyngba ka skim Chief Minister Housing Assistance Programme.
. “Haba ym biang ki jaka sah ne ka iing ka sem, ka ktah wat ïa ka koit ka khiah bad buh jingeh ruh wat ha ka kamai kajih. Kumta da ka jingïohi jngai jong ka sorkar NPP ngi lah ban ai ka jingdonkam kaba kongsan tam na ka bynta kito kiba dei hok,” ka la ong.
Ka la pynshai ruh ba ha katei ka training centre, shen kin sdang noh ïa ka jingai jinghikai ïa ki samla halor ka phang, ‘Kane ka jaka ba ngi plie mynta ka sngi kadei ban ai jinghikai ïa ki khynnah samla na ka bynta kito kiba kwah ban pyntbit ha kam pynbhabriew ba ju leh ha ki por ba don ki jingïathoh shongkurim nalor kiwei kiwei ki jinghikai. Ka la pyntip ruh ba ynda la dep kin sa ïoh ruh wat ïa ki tiar ba kin lah ban sdang ïa ka kam.
Katei ka kyrtong kaba dei ruh ka para jong ka Dr. Ampareen ka la pyntip ba hadien kane kin sa ai jinghikai ruh na ka bynta ki samla ban pyntbit wat ban shet jingshet lane ha ki lain bapher bapher.
U Kongsan ha ka jingkren u la ai ka jingïaroh kaba khraw ïa katei ka rukom treikam jong ka Dr. Jasmine kaba watla kam pat long ka nongmihkhmat hynrei ka la lah pat ban leh haduh kattei la ka long ban ai jingïarap da ki tin haduh ka training centre na ka bynta ki samla. U la ong ruh ba kitei ki tin ba ki ïoh ruh ki dei kiba bha na kiba bha tam kiba kiwei ki nongmih khmat kim ju sam satia kum kitei.
La ïoh ruh ka jingkren na u Bah Fantin, MDC uba la pynpawlang ïa ka jing sngewkmen ba katei ka kyrtong jong ka NPP dalade hi ka mih shakhmat ban ïakhun na ka bynta ki duk ki suk bad ruh ban plie lad ïa ki samla ba kin pyntbit ïalade ha ki kam kiba lah ban ai jingim ïa ki hadien.
Nalor ki nongïalam ka NPP Nongthymmai Block la donlang ruh ha kane ka sngi naduh ki nongïalam jong ka National People’s Youth Front bad kiwei kiwei.