Buh jingkylli u President ka VPP, hato ka roi ka par ka jylla kam dei tang ïa ki katto katne

Shillong, Rymphang 18 : U President ka VPP uba dei ruh u MLA ka Nongkrem u Bah Ardent Basaïawmoit u la buh jingkylli halor ka jingkam jong ka sorkar Meghalaya halor ka roi ka pa, da kaba ong ba ka jingpynkiew lai shah ïa ka ïoh ka kot jong ka jylla kam mut satia ba ka pynkiew lai shah ïa ka ïoh ka kot jong ki nongshong shnong.
“Haba ngi kren shaphang ka roi ka pa, ka mut ba ka roi ka pa hap ban sam. Ka sorkar ka kren da ka jingsngew sarong ban pynkiew lai shah ïa ka ïoh ka kot jong ka Meghalaya, hynrei, ka jingkiew lai shah ïa ka GDP kam mut ban pynkiew lai shah ïa ka ïoh ka kot jong ki paidbah,” la ong u Bah Ardent haba kren halor ka Jingkren Lamphang u Lat, ha ka Dorbar Mangtyngka ha kane ka sngi Balang.
U la kyntu ïa ka sorkar ba kan pynshai la ka jingduk ka la hiar neem ha ka jylla, ka jingkyrduh kam ka la duna neem, bad ba ka ïoh ka kot jong ki nongrep ka la kiew lai shah, da kaba bynrap ba kine ki dei ki jingkylli ba ka sorkar ka donkam ban tuklar.
“Ka jingkylli kaba shisha kam dei ba ka jingroi ka don ne em, hynrei ka jingkylli ka long mano ba ïoh jingmyntoi na ka jingroi. Lada ka jingroi ka ai jingmyntoi tang ïa ki katto katne ki kontraktor ne ki consultant, te ka roi ka par ka long kaba noh shilliang,” la bynrap biang u Bah Ardent.
U la buh jingkylli ruh ïa ka jingkam jong ka sorkar ba ka dei ka jylla kaba ar ha ka jingkiew stet, da kaba kdew ba ka jingïoh kamai (per capita income) jong ka Meghalaya na ka bynta uwei u briew ka dei napdeng kiba duna tam ha ka thain thain shatei lam-mihngi.