Buh jingkylli u Basan ba ai ei ka Sorkar MDA ïa ka jaka ka Kur Thangkiew sha Assam

Shillong, ïaïong, 12: U Basan ka Raid Nongkseh u Bah Nathaniel Thangkhiew u la buh jingkylli ïa ka Sorkar Meghalaya Democratic Allaince (MDA) kumno ka donbor ban shu lilam ïa ka jaka jong ka kur Thangkiew kaba don ha Khanapara sha ka Sorkar Assam nalor ba kane ka jaka ka dang don hapoh ka jingbishar jong ka Ingbishar Supreme Court.
U Basan ka Raid Nongkseh bad ki nongïalam Hima ha ka sngi Baar ki la shah kyntait ha u Myntri Rangbah u Conrad Kongkal Sangma ban ïakren halor kane ka kam hadien ba u Myntri Rangbah u la ai daw ba kim shym la ai shwa kano kano ka jingpyntip ban ïakynduh ïa u.
Ha ka jingïakren bad ki lad pathai khubor, u Bah Nathaniel Thangkhiew ula ong, “ngi sngewsih ba kane ka jaka (jong ka kur Thangkhiew ha Khanapara) ka bym don hapdeng ka jingïakajia bad baroh shikatta ka dei ka jaka jong ngi. Ngi im ngi rep hangto bad ngi don ki ing ki sem ruh hangto. Hynrei dei ka Assam kaba la wan kyntur sha ki jaka ki puta jong ngi ha u snem 2018.”
“Wat haba ngi la ujor sha ki Pulit jong ka Khanapara hynrei kim shym la leh eiei hynrei ki aidaw ba kim lah ban tuklar naba ka jaka ka dei ka jaka nongkynti shimet (private land). I mei jong ngi, i la hap ban pynlut pisa ban leit ujor sha Supreme Court namarba ka jaka ka dei ka Private Land. Ngi lyngngoh pat ba ka Sorkar Meghalaya kumno haba kam shym la ïoh jingbit na ka ktien jong i Mei la shu rai ban ai ei sha ka jylla Assam,” la kynthoh une u Basan ka Raid Nongkseh.
“Wat haba ngi la pyrshang ban leit ïakynduh ïa u Myntri Rangbah hynrei u ong pynban ba ngim shym la buh shwa da ka Appoinmet,” la kynthoh u Bah Thangkhiew.
U la ïathuh ruh ba ha ka sngi ba ki dkhot ka Regional Commitee ki la hiar sha Khanapara u la pynpaw hakhmat u Piyush Hazarika bad hakhmat u Bah Prestone Tynsong ba kane jaka jong ka Kur Thangkhiew ka dei kaba dang don hapoh ka ingbishar Supreme Court.
“Wat u Piyush Hazarika ruh u kubur da kaba ong ba yn sa ïapeit kaei kaba ka ingbishar ka rai,” la ong u Bah Thangkhiew.
“Mynta ngi sah ha ka lyngngoh haba wat ka ingbishar kam pat ai rai eiei hynrei ka Sorkar Meghalaya ka lah da aiti sha ka Jylla Assam,” ula ong.
Shuh shuh u la pyntip ba ka Raid Domria kaba dei ka raid kaba heh bha hapoh ka Hima Mylliem kan sa shah ktah bha ha ka jingïapynbeit pud jong ka kylla kaba ar (PhaseII).
“Lada la buh sharud ïa ka jingïoh laitluid ki Hima Khasi ha u snem 1876 ngi la duh lypa ïa ka jaka,” kren bynñiaw u Bah Thangkhiew.
U Bah Erwin K. Sutnga uba la synran lang ha kane ka sngi, u la ïathuh ba ïa kane ka jingïakajia pud yn lah ban pynbeit tang da ka Supreme Court.
“Ngi la pynkhreh ïa ka dorkhas ban aiti ha u Myntri Rangbah ba dei ban pynkut shwa ïa ka jingïasoi ïa ka Memorandum of Understanding. Khlem ïakren ïa kane, la shu pynstet ïa kane ka kam (ïapynbeit pud) bad ngi la thoh shai ha ka dorkhas da kaba kdew ba ka Sorkar Meghalaya ka don ïa ka Notification jong u snem 1876 bad kiwei kiwei de ki Notification jong ki snem 1915 ter ter bad ngi la pynpaw lut ïa baroh ki Notification ban kdew ba ki jaka kiba la shah klun ki dei ki jaka Khasi,” u la ong.
“Kawei kaba ngim sngew ïahap, ka long ha ka jingshisha ka dei ban don ka jingïasyllok lang, ka jingkynthup ruh ïa ki Autonomous District Council kiba dei ki nongri nongda ïa ka khyndew ka shyiap. Ka Sorkar lei kam don jaka hynrei ha kano ka dur ki ïakren pynbeit halor ki jaka shimet,” ula ong.
U la maham ruh ba lada ka Parliament kan wanrah ïa ka jingpynbeit thymmai halor ka jingïapynbeit pud kan mih ka jingïakhih kaba shyrkhei.
U la kynnoh ruh ba ka jingshim rai jong ka Sorkar Meghalaya ban ai ei ïa ki nongkynti jong ki paidbah sha ka Assam ka dei ka jingpynkheiñ ïa ka Indian Independence Act kaba ki Hima Khasi ki la ïoh laitluid bad ka jingpynkheiñ ïa ka Instrument of Accesssion.
U la kynnoh ruh ba ha kane ka jingïapynbeit pud ka don ka jingïakhaii bad ka kam politik kaba shyrkhei. “20 hajar klur kin ïoh ynda ladep lilam (ïa ki jaka) sha ka Assam. Ynda ngi la ïoh lut ïa ki jingshisha baroh ngin sa pynpaw pyrthei,” la kynnoh shuh shuh u Bah Erwin.