Shillong, Risaw 01: Ka Seng VPP lyngba u Vice President, u Dr. Kara Shen, ka la leit ai ïakynduh bad ai da ka jingthoh ha u Director ka NEIGRIHMS halor ka jingshah leh shiliang khmat ha kaba ïadei bad ka jingkhot aplikeshin ïa ka kam Nursing Officer ha kane ka Hospital.
Ka Seng ba ong ba ha ka website la pyni ba ka jingkhot aplikeshon ka long naduh ka 5 tarik haduh ka 28 tarik u Nailar 2023, kaba hadien la pynjlan pat sha ka 31 tarik ujuh hi u bnai. Katba ka jingpynbna na NEIGRHIMS pat ka dang mih ha ka 25 tarik u Nailur 2023. “Kane ka jingai por tang khyndiat sngi, ka la pynduh lad ïa kiba bun ki samla kiba la pyndep ïa ka jingpule Nurse”, la ong ka Seng, da kaba ong ruh ba kadei ka jingleh jaipdeh na ka liang ki bor pynïaid.
Nangta ka Seng ka la kdew ruh ïa ka jingbym ïoh lad kiba aplai ban jied ïa ki jaka thoh eksam, ha kaba la ailad ba jied tang 6 tylli na ki 26 tylli ki jaka thoh eksam.
Nangta kawei pat ba ka Seng ka la kdew ka long halor ka rta kiba lah ban aplai namar ym shym la pynpaw eiei ïa ka rta, khamtam na ka bynta ki riewlum bad na ka bynta kiba la trei lypa.
Ka Seng haba ai ka jingïaroh ïa ka NEIGRIHMS ba ka pynlong ïa kane ka eksam Nursing Officer Recruitment Common Eligibility Test (NORCET), hynrei ka kyntu pat ba dei ban da pynbiang shuwa ïa kiwei kiwei pat ki jingdonka, khnang ba kan nym long ka jingduhnong ïa ki samla ka jylla.
