Buh jingkylli ka KSU-EJHD ïa ka tnat pulit ka jylla halor ka jingïoh rung ki briew na Bangladesh

By Mawphor Editor On Jun 18, 2022

Khliehriat jylliew 17: Ka KSU East Jaiñtia Hills District Unit hadien ka jingïoh bat u Secretary shnong jong ka shnong Kuliang ïa ki 11 ngut ki khar Bangladesh ki ba kynthup 4 ngut ki kynthei kiba thmu ban rung beaiñ sha ka jylla Meghalaya ha ka janmiet jong ka 16 tarik u Jylliew 2022, kumta na ka liang ka seng ka la buh jingkylli hakhmat ka tnat pulit ka Sorkar jylla ba balei kam lah ban teh lakam ïa ka jingwan rung beaiñ jong kine ki khar bangla sha ka jylla.
Ka seng ka la ong ba kine ki khar Bangla ki la ïoh lad ban rung beaiñ shapoh ka jylla Meghalaya dei lyngba ki dalal khasi ki ba btin lynti bad ïalam ïa ki, la ong ruh ba katkum ka jingïoh jingtip la tip la ong ba kine ki khar Bangladesh ki la thmu ban hiar riehtngen ne sah ha ka shnong Ladrymbai bad ïa kine ki briew la phah noh sha Umkiang Patrol Police Post bad la ai FIR noh da u Secretary shnong Kuliang ha kaba la synran lang ha katei ka por da u Samla Phanuel Tongper uba dei u Environment secretary ka KSU EJHD bad ka jingïadon lang i Kong Deiwi Tongper President ka STIEH.“
Kum ban shu pynkynmaw ba dang shen ha kine ki sngi ba la leit noh ka KSU East Jaiñtia Hills District Unit lyngba ka shnat treikam jong ka ka KSU Khliehriat Unit ka la ïoh ban bat ïa ki khar bangla hadein ba la lait na ki kti jong ka seng hi na Lumshnong bad ka la ïoh ban bat ïa shi kali ki Khar Bangla kiba thmu ban buhai shnong sha ka Bri u Hynñiewtrep bad ruh ïa kine ki briew la thmu ban pynhiar ha ka shnong Ladrymbai hi bad kumjuh ïa kine ki briew la btin lynti da ki dalal ki ba dei hi ki Khasi.
Na ka liang ka seng ka pynrem jur ïa kane ka jingbym lah ka tnat infiltration lyngba ka tnat pulit ban tehlakam lane ban peit pyrman ïa ka jingrung beaiñ kum kine ki jait briew. Ka seng ha kum kine ki jingjia ba khah khah ka pynpaw sha ka sorkar jylla ba ka Inner Line Permit hi kan dei ka stieh ba khlaiñ ban tehlakam ïa kum kine ki jingjia.
Ka seng ka la ban ruh ba hato kitei ki infiltration check gate kin dei tang ban ki phalor na bynta ki trai ri trai muluk hynrei ym ïa ki bar jylla bad bar ri. Ka jingtlot bor ka tnat pulit ban peit pyrman ïa kum kine ki jait jingjia ka pynduh jingshaniah ïa u paidbah ka thaiñ bad ka jylla hi baroh kawei, ong ka Seng.
Ka seng ka ban sa shisien ba ka jingïoh bat ki dkhot ïa kine ki kahr Bangla ha kane ka taïew ba la dep kadei ka jingkheiñ sting ki bor ba dei peit bad tang hapoh shitaïew la ïoh bat biang, bad kane ka pyni ruh ka jingtlot ka sorkar bad ka jingbym shimkhiaka sorkar ban peit ïa kum kine kam beaiñ.
Nalor kata ka seng ka kwah ban pynpaw shai ba ka East Jaiñtia Hills District kam dei satia ka jaka bret bar ri bar jylla bad ka lyngba kane ka kyrwoh ka seng ka maham tyngeh khamtam sha ki myndie ri kiba long ki kruiñ kiba pynjaboh ïa ka bri u Hynñiewtrep da kaba long ki nongbtin nongkdup nongda jong kine ki bar jylla.
Shuh shuh ka Seng ka maham ba kan ym map satia ïa ki ba thmu ban wanlam bad ban buhai shnong sha ka district bad ka jylla hi baroh kawei bad lada lap ka seng kan shim ïa ka seinjam ba tyngeh. Ka seng ka dawa ruh na ka sorkar ba kam dei satia ban kheiñ sting ïa kine ki kam beaiñ bad ka sorkar ka dei ban thaw ki lad ki lynti mar mar ban teh lakam ïa kine ki jingrung beaiñ ki briew ba na bar sha ka jylla lem kumta ka seng kan shim hi ïa ka aiñ ha kti bad leh ïa ka ba donkam.
Kyntang ïawai ka seng lyngba kane ka kyrwoh ka kyntu jur ïa ki dorbar shnong kylleng ka district bad ki shnong ba don sha ki khappud ba kin ïatreilang bad ka seng bad rat diengkhong ïa kum kine ki jait kam namar ki dorbar shnong hi ki long ki stieh ba ha khmat duh ban ïada na ka jingrung kyrthlep ki bar jylla. Ka seng ka kyntu bad kyrpad ïa ki Rangbah shnong ba kin husiar bad ruh ba kin long kiba skhem ha ka ban ïada ïa ka khyndew ka shyiap ka ri bad ka jaidbynriew.