Shillong, Ïaiong 30: Ka All India Trinamool Congress (AITC) hynne ka sngi saitjaiñ, kala buh dak jingkylli ïa u Myntri Rangbah ka Jylla Conrad Kongkal Sangma halor ka jingleh bym kheiñ snep ïa ki paid nongshongshnong ka Jylla.
Ha ki artylli ki jingthoh hapoh ka Twitter, ka AITC Meghalaya kala kynnooh ïa ka Sorkar Meghalaya Democratic Alliance (MDA) ba ïalam da ka NPP baka pynieng ïa ki khyrdop lum khajna ba be-aiñ, ka jingpyndik ïa ki nongniah trok bad ka jingpynlip bording ba khah khah.
Kat kum ki khubor na ki lad pathai khubor, ki don haduh 30 tam ki khyrdop lum khajna ba be-aiñ tang ha Ri-lum Khasi kiba lum pisa be-aiñ na ki trok ba ïaid lynti.
Watla ki jingthoh kila mih ha ki lad pathai khubor ba kylli ïa ka jingshong aiñ, kine ki khyrdop ki dang ïai treikam beit bad lum pisa be-aiñ.
“Ka Sorkar MDA ba ïalam da ka NPP kala ïohthiah lyngngai bad u Myntri Rangbah ka Jylla Conrad Kongkal Sangma um don jingkhuslai eiei ruh eh. Ula phai lyndet ïa ka jingeh jong ki Nongniah trok bad u Myntri Rangbah ula shu bunkam ha kaba lute ïa ki paidbah ka Jylla” ong ka AITC.
Ha kawei pat ka liang, ka jingkam jong ka Sorkar MDA haba ïadei bad ka jingpynlip bording khah khah kam shym la long satia kaba shisha.
Haba pynrem ïa kane ka jinglong jingman, ka AITC Meghalaya kala kynthoh “Ka jingpynlip bording ka dei kaba jia khah khah. Kane ka dei ka bym lah satia ban iashah. Kane ka dei ban jia. Ka Sorkar ka dei ban pynbiang namar ngi la siew beit ïa ki bai bording”. Ki nongshongshnong ka Meghalaya CM @ Sangma Conrad, kaei kaba khang ïa phi ban pynbiang ïa ka jingdonkam jong ki briew lajong”.
“Kane ka jingleh bym kheiñ snep ïa ka bha ka miat jong ka Jylla kam dei satia kaba dang shu jia. Hynrei, ka jing bym leh eiei jong u kan ym khang lynti satia ïa ngi ban leh eiei. Ka AITC Meghalaya kan pynsawa ïa ka sur pyrshah ïa baroh ki kam bym dei tad haduh baka Jylla kala lait na ki tyrsim jong ka Sorkar MDA ba ïalam da ka NPP” ong ka AITC.
