Shillong, Naitung 26: KSU lyngba ka Employment Cell ka la buh bun ki jingkylli ia ka MPSC halor ka jingtreikam jong ka kaba la pynmih shibun ki kynrum kynram bad ki jingbymshai.
Ha ka jingthoh ba la ai sha u Chairman ka MPSC, ka Seng ka la pynpaw ka jingsngewkhia bad pan jingpynshai halor ka jingpynbna arsien ia ka result jong ka eksam Meghalaya Civil Services(MCS) kaba la wanrah bun ka jingartatien ia ka rukom leh namar ba tang na ka daw jong ka jingbakla ki jingkylli la hap ban pynmih result biang sa shisien da kaba pyn pass sa 62 ngut ki Candiadate.
“Kane ka mut ba kito kiba pass mynshuwa ki dei ki bym biang haba la pynkylla ia ka result ban pynpass sa 62 ngut”, la ong ka Seng.
Ka Seng ka la ong ruh ba kane kaba jia kam dei na ki Candidate hynrei kadei ka jingbym ler treikam ka Commission bad kane ruh ka buh jingkylli ia ka burom jong ka Commission.
U Bah Ruben Najiar, Chairman jong ka Employment Cell, u la ong ba ka Seng ka la ioh jingtip ba kane ka jingleh ka MPSC kam dei ka jingleh khnang, hynrei kadei ka jingleh khnang tang ban pynhun iano re iano, ia kaba ka Seng kan sa sei hadien ynda ka la ioh jingtip kaba thikna lyngba ka RTI.
