Buh ïa ka mobile sharud kumba 15 minit, ki khun kin sa bud lang: Prof Shalini Lihitkar
Pynshlur ka tnad Arts and Culture ban pynmliem pule kot
Shillong, Risaw 18 : Ka Prof Shalini Lihitkar ka nonghikai ba pawnam bha na ka Department Library and Information Science ha Rashtrasant Tukadoji Maharaj Nagpur University ka la kyntu ïa ki kmie ki kpa ba kin pyrshang noh ban pynshong thait ïa ka mobile la kumno kumno 15 minit man ka sngi.
Ïa kane ka la kren kum ka Nongkren ba kyrpang ha ka workshop kaba long ha Soso Tham Auditorium, Shillong halor ka phang, ‘Habit of reading as a tool for social development and economic upliftment’ ïa kaba la pynlong da ka tnad Arts and Culture jong ka sorkar jylla ryngkat ka National Mission on Libraries Scheme.
Ha kajuh ka por pat ka la ong, “Ha kine ki 15 minit ki kmie ki kpa ki dei ban shim noh da ki kot ban pule bad da kaba leh kumne khlem pud na ka bynta 21 sngi ki khun kin sa pyrthuh lang bad kane hi kan ïarap ban pynrung ïa ka mynsiem sngewtynnad pule kot ha baroh ki khun.”
Shwa kane, na ka liang u Myntri ka tnad Arts and Culture ka sorkar jylla Bah Sanbor Shullai haba kren kum u Kongsan u la ong ba ka jingsngewtynnad ban pule ïa ki kot Bakhuid kampher lada dei na kano kano ka niam, kadei shi bynta ban pynrung ïa ki khun ïa ka jing sngewtynnad ban pule kot.
U la ong ruh ba ka long kaba kongsan ïa ki khynnah ba kin sngewthuh ba ka pule puthi ka dei shi bynta jong ka jingim jong ki bad ka jinglah jong ki ban leh bha ha ki jingpule ruh ka dei ka jingkyrkhu ïa ka jingim jong ki hi.
“Dei lyngba ka jingpule kot ba ka jingnang jingstad ka nang kiew bad ka jingmut jingpyrkhat ka nang jylliew kumta ka pynkylla ïa ki jingim bad ïa ki paidbah hi baroh kawei. Ka jingmlien ban pule kot ka lah ban pynlong ïa ngi ban kham tip ïa ka kolshor, ka imlang sahlang, bad kiwei kiwei, da kaba pynlong ïa ngi ki briew kiba kham tip bad pule bha ha ki snem ban wan,” ong u Myntri haba kren ha ka jingïalang
La ïoh ruh ïa ka jingkren na ka Director ka tnad Kong Ïada Majaw bad la pynphuh ïa ka prokram da ki jingrwai bad ka jingshim bynta shitrhem ki khynnah skul bad ki nonghikai na ki skul bapher bapher.
Kiba ïashim bynta ki kynthup ïa ki samla pule na ki 15 tylli ki skul, ki samla pule na North-Eastern Hill University, Martin Luther Christian University, ki dkhot jong ka Kali Kit Kot bad ka Seng Kynthei Laitumkhrah Pyllun, ki riew shemphang ha ka library bad ki nongpyndonkam ïa ka library jong ka State Central Library.