Khliehriat, Naiwieng 24 : U bah Bring Dkhar bad u bha Lektor Dkhar kiba na ka shnong Khliehmyntriang East Jaiñtia Hills District mynta ka sngi ki la leit iakynduh bad buh ruh da ka jingthoh hakhmat u Deputy Secretary Jaiñtia Hills Autonomous District Council halor ka jingpynslem palat ka council ban thung Waheh Shnong thymmai ha shnong Khliehmyntriang, halor kane kitei ki rangbah ki la kyntu ïa ka council ka dei ban buh tarik noh ban pynlong ïa ka election ban jied Waheh Shnong thymmai.
Haba iakren bad u Deputy Secretary JHADC, u bah Lektor Dkhar u la ong ba ka shuki Waheh Shnong ha Khliehmyntriang ka la dei ban kut naduh ka 23 tarik u bnai risaw 2025 bad kane ka jingpynslem ban jied thymmai da uwei ka buh jingeh bad ktah shibun namar lada ki nongshong shnong ki donkam ïa ki syrnot Residential Certificate bad kiwei kiwei ki syrnot ba dei ban ioh na u Waheh Shnong ruh kim ioh bad ruh ka pynduh jingmyntoi ïa ki nongshong shnong ha kaba iadei bad ka jingdonkam ïa ki kot ki sla ba sei banioh na u Waheh Shnong bad duh ruh ïa ki skim, ki project kiba wan ka ka sorkar namar ki lad jingmyntoi kin nym lah shuh ban wan hapoh shnong lada ym don Waheh Shnong, u la kyntu ïa ka council ba kan pynkloi noh ïa kane ka kam bad la ong ruh ba halor kane na ka liang u Deputy Secretary Jaiñtia Hills Autonomous District Council u la kular ba un sa pynkloi ïa ka kam.
Shuh shuh la ong ruh ba kane ka jingleit iakynduh jong kitei ki ar ngut ki briew kiba na Khliehmyntriang ban iakynduh ïa u Deputy Secretary Jaiñtia Hills Autonomous District Council ka dei ban pynsngew ïa ka sur jong ki nongshong shnong ha kaba ki la ïa soi lang ruh ha ka memorandum namar ba ki kwah ban don noh u nongialam u ban pyndap ïa ka shuki Waheh Shnong ha Khliehmyntriang.
