Buh da ki jingkdew kiba shai ha ki jaka ba don jingma, bthah u Dy CM ïa ka NHIDCL

Shillong, Nailar 04 : U Symbud Myntri Rangbah ka jylla, Bah Prestone Tynsong u la bthah ïa ka National Highways and Infrastructure Development Corporation Limited (NHIDCL) bad ïa ka kompeni shna surok ha ka thain ba kadei ban buh da ki jingkdew kiba shai ha ki jaka ba don jingma ha shi lynter jong ka surok ban leit sha Pynursla.
Kane ka jingbthah jong u kadei na ka jingkhlad noh jong ki san ngut ki nongleit jingleit ha ka miet sngi U Blei hadien ba ka kali baki shong ka la hap sha ka rat kaba jylliew ha Rngaiñ.
Haba phah ïa ka jingsngewlem sha ki bahaiing hasem jong kitei ki lanot, u Symbud Myntri Rangbah u la ong ba la pyntip ruh ïa u ba ha katei ka miet ka dum lyoh bha bad kumta ïa ka daw tynrai yn sa tip lut tad haduh ban da dep ka jingtohkit.
U Bah Prestone u la ïathuh ruh ba ha kane ka sngi u la don ruh ka jingïalang bad ka kompeni kumjuh bad ka NHIDCL ban ïa kren halor ka jingshngain ka surok kaba dang pyntrei mynta.
“Ka jingïalang jongnga mynta ka sngi ba ka kompeni ba pyntrei bad ruh bad ka NHIDCL ka long ban pyntikna ba ki jingkdew kiba shai dei ban buh ha ki jaka ba don jingma kat ha ki jaka ba i donkam ban buh,” u la ong.
Shuh shuh u la ïathuh ba na ka liang u Chief Engineer of PWD (National Highway) un sa leit ban jurip ïa ki jaka ba i don jingma bad ban pyntikna ban don ïa ki jingkdew kiba shai.
Halor ka jingkylli kaba iadei bad ka bai luksan sha kitei ki lanot, u Symbud Myntri Rangbah u la ong ba ka jingtohkit mynta ka dang ïaid bad kumta u la bthah ïa ka SDO Civil ban phah ïa ka kaiphod halor katei ka jingjia khnang ba kin lah ban shim rai.
Nangta u ong ruh ba ka jingshngain ha surok kadei ka bynta kaba kongsan tam khnang ban khanglad ïa kino kino ki jingjia ba sngewsih hadien habud.