Buddien u Dy. Secy ka NESIDS ïa ki kam pynroi ha Ri-Bhoi District kum ka Aspirational District

Nongpoh, Risaw, 18: U Deputy Secretary ka North East Special Infrastructure Development Scheme (NESIDS), jong ka sorkar India u Ankit Mishra mynta ka sngi u la shong jingïalang bad ki ophisar ka Ri-Bhoi ban peit bñiah ïa ki kam pynroi bapher bapher ba la pyntreikam ha Ri-Bhoi District kaba dei ka Aspirational District ha ki tnad sorkar bapher bapher kum ka koit ka khiah, ka pule puthi, ka rep ka riang bad kiwei kiwei.
Ha ka jingïalang kaba la long mynta ka sngi ha Conference Hall jong ka ophis u Deputy Commis-sioner ka Ri-Bhoi na ka liang u Bah Eric Dkhar Assistant Commissioner ka Ri-Bhoi ba dei ruh u BDO ka Umling C&RD Block u la ai ka jingbatai kaba bñiah halor ki kam bapher bapher ba la pyntreikam ha Ri-Bhoi District hapoh ka Aspira-tional District Programme ha ka jingdon-lang u R. Bramah ADC cum Project Director DRDA, ka kong B.L Pakyntein ADC, ki ophisar na ki tnat sorkar bapher bapher bad kiwei.
U Ankit Mishra u la kyntu ïa ki nongtrei District ba kin trei shitom shuh shuh ban kyntiew ïa kine ki jingthmu bad ban kiew shakhmat ha ka Delta ranking.
Shuh shuh, na ka liang u Mishra u la leit ruh ban jngoh ïa ki jaka pule ha RBP Higher Secondary School Nongpoh, Umsning CHC, Tea Boutique & Eco Tourist Lodges ha TDC Umsning, Umroi CSC bad Auxilium Skills Training Centre ha Khapmara. Nalor kata, ha ka 19 tarik Risaw, u Deputy Secretary un dang bteng ïa ka jingleit peit bniah sha Umsawnongkharai SC, Umdihar AWC, shnong Dulongnar bad kiwei kiwei.