Jowai, Jymmang 21: Ka Jaiñtia Students’ Movement (JSM) mynta ka sngi ka la leit ban kynduh ïa ka Additional Deputy Commissioner ka West Jaiñtia Hills District ka kong B. Blah MCS, kum shi bynt ban buddien ïa shithi ba la dep ujor halor ka jingduh klas jong ki samla pule kaba dang jia haduh mynta.
Ka seng ka la leit ban pynkynmaw ïa ka shithi ba la dep ban phah sha ka tnad pule puthi jong ka ophis DSEO bad kumjuh sha ka ophis u DC West Jaiñtia Hills District ha ka 05/05/2025 kaba ïadei bad ka Admission Class XI jong ka snem 2025-26.
Na ka daw ka jingduh klas da ki spah ngut ki kynnah kiba la ai jingtip sha ka JSM bad mynta kitei ki khynnah ki don hapdeng ka jingsyier mynsiem ïoh kumno kumno kin duh noh ban leit pule puthi.
Daka mynsiem kaba sngewkhia ïa ki khynnah pule ka seng ka la leit ban buddien biang ïa kane ka kam, da kaba kyrpad ïa ka sorkar ba kan thaw ki lad ki lynti ban pynïoh Admission ïa baroh ki khynnah pule hapoh ka Ri Lum Jaiñtia.
Ka JSM ha ka jingïakynduh bad ka kong B. Blah ka la kular ban shimkhia ïa kane ka kam bad kan khot ïa ka jingïalang bad ka tnad kaba dei peit ïa kane kam, da kaba pyntikna ruh baroh ki khynnah pule kin sa ïah ïa ki Admission hadien kane ka jingïalang.
Ka Seng ka khot bad wer ïa baroh ki khynnah kiba dang duh Klas ba kin wan shakhmat ban ai jingkyrshan lem ïa ka seng na ka bynta ban pynïoh ïa ka hok kaba long ka lawei ban saiñdur ïa ka jingim jong ki.
