Shillong, Jymmang, 04: Ka Federation of All Meghalaya Achoc Secondary School Teacher’s Association (FASMASTA) ka la pyntip sha ki para nonghikai ba ka la ïai buddien ïa ki jingdawa na ka tnat Pule Puthi jong ka Sorkar Jylla.
“Ngi kwah ban pynshai sha baroh ki nonghikai Adhoc ba ngi ju ïai buddien ïa ki jingdawa na ka tnat Pule Puthi ka Sorkar Jylla na ka por sha ka por ban pynkynmaw ïa ki jingeh ba ngi la mad na ka jingkiewdor jong ki mar ki mata. Wat hadeng ka jingwan lynshop jong ka khlam jingpang ngim shym la sangeh ban trei na ka bynta ka bha ka miat jong ki para nonghikai,” ong u kyrwoh ba la phah da ka President ka FAMASTA ka Kong B. Kharumnuid.
“Dang shen ha ka 13 tarik u bnai baladep ngi la ïakynduh biang ïa ki Heh Ophisar jong ka tnat Pule Puthi ban dup tip halor ka jingtyllun jong ka kam. Ngi kyrmen skhem ba ka Sorkar kan leh ïa kaba bha tam ban shim ïa ki lad ki lynti ban weng ïa ki jingeh jong ki nonghikai,” ong u kyrwoh.
“Ngi ai khublei kyrpang ïa u Myntri ka tnat Pule Puthi u Bah Lahkmen Rymbui khamtam ïa u Myntri Rangbah ka Jylla u Conrad K. Sangma ban pynurlong noh ïa ki jingdawa jong ki nonghikai skul kham kloi,” la bynrap u kyrwoh.
