Shillong, Nailur 15 : U MLA ka Mawlai, Bah Process T Sawkmie ha ka sngi Palei u la kyntu ïa ka sorkar jylla ba kan buddien biang na ka sorkar pdeng haba ïadei bad ka jingdawa pyntreikam ïa ka Inner Line Permit (ILP).
Haba rah ïa katei ka mat ha ka Dorbar Synrai ha kane ka sngi, u Bah Process u la ong ba ar snem ka por ka la ïaid naduh ba ki mynjur ïa ka Official Resolution. “Nga sngew ba ka long kaba dei ban wanrah biang da ka Resolution ban pynkynmaw ïa ka sorkar halor kane ka ishu,” u la ong da kaba kdew ba ka jylla Manipur ka la wanrah da ka Resolution halor ka ILP haduh lai sien.
Da kaba banjur ban buddien bha ïa katei ka ishu, utei u MLA u la ai jingmut ïa ka sorkar ba kan kyntu ïa ki MP jong ka Jylla ba kin rah biang ïa kane ka ishu bad ka sorkar pdeng. Haba jubab halor kane, u Myntri Rangbah ka jylla Conrad K Sangma u la ong ba mynta ka sorkar ka dang ap ïa ka jubab na ka Ministry of Home Affairs (MHA) ka sorkar pdeng. U ong ruh ba ka sorkar jylla ka la shim lut ki lad ki lynti ban kyntu ïa ka sorkar pdeng ba kan pdiang ïa katei ka jingkyrpad jong ki.
U Myntri Rangbah u ong ruh ba na ka por sha ka por ki la pynkynmaw ïa ka sorkar pdeng halor katei ka mat jingdawa.