Mairang, Nailar 29: Ka North East Zone Cultural Centre (NEZCC) Dimapur, kaba long kawei na ki shnat treikam jong ka Ministry of Culture ka Sorkar India, ha ryngkat ka jingïatreilang bad ka tnat Arts and Culture ka jylla Meghalaya, hynne ka janmiet ka la pynlong ïa ka prokram jong ki jingrwai bad jingshad tynrai, kum shibynta jong ka jingleh burom ïa u riew shlur ïaleh laitluid ka ri, U Tirot Sing Syiem, ha ka jingrakhe ka Ri India ïa ka Azadi Ka Amrit Mahotsav, kaba long ka jingrakhe ha salonsar ka Ri India ïa ka jingdap 75 snem jong ka jingïaleh laitluid jong ka.
Ha kane ka prokram ïa kaba la pynlong ha Khasi Patriotic Home, Nongkhlaw la wan ban sakhi da u Lamphang ka Ïing Dorbar Thaw Aiñ ka jylla, u Bah Metbah Lyngdoh u ba la wan kum u kongsan, ha ka jingdon ryngkat u Syiem ka Hima Nongkhlaw, u Pa’iem P.M Syiemlieh, u Additional Deputy Commissioner ka Eastern West Khasi Hills District, u Bah A. Nongbri, u Superintendent of Police ka District, u Bah M. B Syiem, I Assistant Director ka Directorate of Arts and Culture, I Kong D. Kharjana, u Syiem Khynnah ka Hima Nongkhlaw, u Bah K. M Syiemlieh, ki dkhot ka kur Syiemlieh, u Sordar ka shnong Nongkhlaw, u Bah Clement Dkhar, ki khynnah skul bad ki paidbah nongshong shnong ka shnong Nongkhlaw.
Ha ka jingkren kum u kongsan, u Lamphang ka Ïing Dorbar Thaw Aiñ ka jylla, u Bah Metbah Lyngdoh u la ong ba ka jingrakhe ïa ka jingkhraw u Tirot Sing Syiem lyngba ka jingrakhe ka Ri India ïa ka Azadi Ka Amrit Mahotsav, ka pynkynmaw ïa ki paidbah nongshong shnong, ïa ka mynsiem ba shlur bad bym aili jong ki riew ïaleh laitluid ka ri.
U la ong ba ka pynïoh ruh ïa ka lad ka kabu na ka bynta ki paidbah nongshong shnong, ban pyrkhat halor u synñiang u bynhei u ba ki lah ban noh, kum shi bynta ban kyntiew ïa ka bha ka miat jong ka imlang sahlang lyngba ki sap ki talen ba u Blei u la ai ha ki.
Ha kane ka sngi, u Bah Metbah u la khot la wer ruh ïa ki paidbah kiba la sakhi lang ïa kane ka prokram, ba kin ring jingmut na ki jinghikai jong ka jinglong jingim u Tirot Sing Syiem, u ba la ïakhun doh ïap pyrshah ïa ki bor ka sorkar phareng, ban pynneh pynsah ïa ka kolshor bad ka snap kyrpang jong ka ri lum Khasi.
La pynphuh pynphieng ïa kane ka prokram da ki jingrwai tynrai, jingshad tynrai bad ruh ka skit halor u Tirot Sing Syiem da ki riew don sap ka Distrik bad kumjuh kiwei de kiba la wan na nongbah Shillong.
Kiwei kiwei pat kiba la kren ha kane ka prokram ki kynthup ïa u Syiem ka Hima Nongkhlaw, u Pa’iem P.M Syiemlieh bad I Assistant Director ka Directorate of Arts & Culture, I Kong D. Kharjana.
