Bud dien ka sorkar jylla ïa ki Drone ka Bangladesh kiba wan her shaduh jan Sohra bad Shella

Shillong, Nohprah 16 : U Symbud Myntri Rangbah ka jylla u bah Prestone Tynsong uba dei peit ïa ka tnad kam pohïing, u la ïathuh ba ka sorkar ka bud dien bha ïa ka jingwan her ki Drone ka Bangladesh shapoh u pud u sam ka Meghalaya kata shaduh jan Sohra bad Shella kiba la tip kyrteng kum ki Bangladeshi Bayraktar TB2 Unmanned Areal Vehicles (UAVs).
Ki bynta khappud jongka Meghalaya bad ka Bangladesh ki jrong haduh 443 KM bad ïa kine ki UAVs la ïohi dang ha kine ki khyndiat sngi ba ki her na suiñ hajan Sohra bad Shella, East Khasi Hills.
Haba ïakren bad ki nongthoh khubor u bah Prestone u la ong “ Ngi na ka sorkar ngi bud dien ïa kane bad ngi ïai pyntip sha ka sorkar pdeng bad ka sorkar pdeng ruh ka la shim khia bha halor kane. Na ka liang ka sorkar ka la bthah ïa ki bor pulit jongka ba kin leh ïa kaba donkam baroh bad ban long kiba peitngor bha”.
“ La bthah ba ki bor pulit ka jylla kin leh ïa katba shah ka kam kumjuh ruh ka don ka jingïatrei lang kaba jan bha hapdeng ka sorkar jylla bad ka sorkar pdeng halor kane ka kam bad nga ngeit skhem ba baroh kiei kiei kin ïaid beit ïaid ryntih”.
Shuh shuh na ka liang u Symbud Myntri Rangbah u la ong “ Ka dei ruh ka kamram jongka sorkar pdeng ban ïakren ïa kane ka kam bad ka sorkar Bangladesh namar ka dei ka kam kaba ïa dei bad ki ar ri”.
U la iïthuh ba la bthah ruh ïa u Chief Secretary ka jylla bad kumjuh ruh ia ka Director General of Police (DGP) ba kin leh ïa kaba donkam baroh. Haba kyntait ban ïathuh bniah halor kane ka kam u bah Prestone u la ong “ Peit shane ki don ki mat kiba ngam kwah ban ïathuh bniah kumta sngewbha sngewthuh ba kane ka kam ka long kaba kam kyrpang kumta ngam lah ban ïathuh lut nadong shadong. Kaei kaba nga la ong ba na ka liang ka sorkar ka la shim khia ïa kane ka kam bad ka kamram jong ngi ka long ban khmihba kum kine ki jingjia kim dei ban dang jia biang hadien habud”.
U la ïathuh ba ka sorkar ka ïai bud dien ba ïa kynduh ruh na ka por sha ka por halor kane ka jingjia. “ Ka jingbishar bniah ka long na kawei ka sngi sha kawei ka sngi hynrei ngam kwah ban ïathuh ïa kiei kiei baroh namar ki don kiei kiei kiba hap hi ban buhrieh khamtam kiba ktah ïa ka jingshong suk shong shngaiñ ka ri.