Shillong, Lber 24: U Myntri ka Tnad Pule Puthi Rakkam A Sangma ha ka sngi Nyngkong, ula shong bishar kam halor ki project tei ïingskul ba dang sahteng ha kylleng ki jaka ka Jylla bad bthah ba dei ban pyndep kloi noh ïa ki.
Ha kaba ïadei bad kane haba ïakren bad ki nongthoh khubor hadien ka jingïalang, u Rakkam ula ong, “Ngi la shong bishar kam ïa baroh ki project ba sahteng. Ngi la bthah ïa ki ophisar bad ki agency ba pyntrei ba kin pynkloi noh bad pynthikna ba kin dep noh kloi katba lah”.
La ong ba kine ki project ba dang sahteng ki kynthup ïa ka jingtei jong ka Science & Commerce College ha Mawphlang, Mahendragrank, Patharkhmah, Rongjeng, DIET ha Williamnagar bad Polytechnic ha ki District kum ka South Garo Hills, West Jaiñtia Hills, West Khasi Hills, East Garo Hills bad Ri-Bhoi district.
Na ka liang jong u Myntri u la ong ba ki don ki daw bapher bapher halor ka jingslem bad katto katne ki dei namar ka jingslem ban pyntrei na ka liang ki contractor bad don ruh namar ka kam jaka puta.
“Ki jingpyrshang ki la ïaid shaid shaid ban pynbeit noh ïa baroh kine ki jingeh ba ïakynduh,” pyntip u Myntri.
Halor kane u Rakkam ula pyntip ba na ki 38 tylli ki Eklavya Model Residential Schools (EMRS), lai tylli – Mawkynrew, Khararshnong, Laitkor bad Rongra – ki ïakynduh jingeh ha ka jaka ïa kaba la bthah ïa ki Deputy Commissioner bad ki Block Development Officer (BDO) ba kin ïakren bad ki trai jaka bad ban pynbeit noh kham kloi ïa ka kam.
Ha kaba ïadei bad ki 13 tylli ki EMRS u la ong ba ki la don ha ki kyrdan bapher bapher jong ka jingpyntrei bad 16 tylli ki la don ha ka kam ban khot tender ïa kaba ka sngi ba khatduh la buh ban long ha ka 25 tarik Lber bad 7 tylli ki dang don ha ka jingpynkhreh ïa ki kot ki sla kiba donkam.
“Hashuwa kane, ïa ka kam la aiti sha kawei ka agency na Manipur ha u 2019-20 hynrei ka Sorkar Jylla ka la thoh sha ka Ministry bad ka Ministry ka la ai biang ïa ka kam sha ka Sorkar Jylla ba kan pyntrei ïa ki EMRS” bynrap u Myntri.
Hapoh ka Mission Education, u Myntri u pyntip ba 1608 tylli ki skul ki la ïoh ïa ka mang tyngka ban tei pynbha ïa ki ïingskul.
“Ha kiba bun ki district ka jingtei pynbha ïa ki skul ki la dep hynrei sngewsih ban ong ba katto katne ki jaka kum ka Mawsynram, Mylliem (EKH), bad Khliehriat (EJH), Amlarem (WJH), Umsning (Ri-Bhoi) Mawthadraishan (EWKH)-ki kam kin dang sdang bad ngi la shong bishar ïa kane mynta ka sngi,” ïathuh u Myntri.
