Shillong, Nailar 26: Namar ba ka don ka jingbym lah pyntreikam bha ha kaba ïadei bad ka jingtrei MNREGS ne ka jingtrei shi spah sngi ba kham ïa tip paidbah, u Myntri ka tnad C&RD, u Bah Hamlet Dohling, u la bthah ïa ki ophisar ban pynlong da Workshop ba shi sngi na ka bynta ki BDO bad ki Junior Officer ban pynsngewthuh halor ki jnit ki jnat kiba bun ha kaba pyntreikam ïa kane ka skhim.
Kane ka la mih hadien ba u Myntri u la lum ïa ka jingïalang jong ka State Rural Employment Society (SRES) kaba long ka bor ba peit ïa ka jingpyntreikam ïa ki skhim na ka bynta ki nongkyndong, ha kaba la shem ba bun ki Block kim lah ban pyntreikam bha ïa ka 60% ka skhim Natural Resource Management kaba dei ban rung lang ha ka skhim MNREGS.
Kiwei pat ki jingeh ki long ka jingbym lah ban pynlong kam ïa ka jingïatreilang kiwei pat ki tnad treikam ne ka Convergence, nangta ka jingsahkut ki PMAY-G Scheme ne ka skhim shan ïing baduk, ha kaba kiba bun kiba ïoh ïa kane ka skhim kim don jaka la ka jong ban shna ïing wat lada ki ïoh ïa ka skhim.
U Myntri u la kyntu ïa ki ophisar ba kin trei shitom ban pynlong ka jingleit jurip ïa ka jingpyntreikam ïa ki skhim bapher bapher kiba la pyntreikam ha jylla. U la kyntu ruh ïa ki ophisar ba kin pyndonkam ïa ki app ha ka jingtreikam jong ki.
Ha kane ka jingïalang la ïadonlang ruh u Bah T. Lyngwa, IAS, uba long u Secretary ka C&RD, u Shibhi Chakravarthy, Mission Director ka SRES, Kong Ïaraphunlin Diengdoh, Joint Mission Director ka SRES bad kiwei ki ophisar.
