Bthah u Justice Katakey ïa ka Sorkar ban lilam noh ïa u dewïong ba 32 lak metric ton Shillong, Jylliew, 19: U Justice (Retd) BP Katakey u la pan jubab na ka Sorkar Jylla halor u dewïong uba 32 lak metric tons uba ladep tih bad uba don ha ki bynta bapher bapher jong ka jylla bad ha kajuh ka por u la bthah ruh ba dei ban lilam noh ïa une u dewïong hapoh shi snem. U Katakey, uba la thung da ka Iingbishar Meghalaya High Court na ka bynta ban ai jingmut ha kaba ïadei bad ka jingpyrshang jong ka Jylla ban bud ïa ki kyndon kiba la bthah da ka Ingbishar Supreme Court bad ka National Green Tribunal (NGT), kynthup ruh ka jingdie ïa u dewïong ba ladep tih, u la khot bunsien ïa ki jingïalang bad ki ophisarka Srokar Jylla ha kaba ïadei bad kane ka kam. “Ha ka jingïalang ba la long dang shen, u (Katakey) la bthah ïa ki Deputy Commissioners ba kin shondur ïa baroh 32 lak metric tons u dewïong ba la pynbna lyngba ka Affidavit ba la aiti hakhmat ka Ingbishar Supreme Court bad lada jia ba lap u dewïong u jah, ki briew (trai dewïong) kin hap ban siew da ka dor,” ong ka thymmei khubor ba la ïoh lum na kane ka jingïalang. Ïa ki dur yn sa shon hakhmat ki ophisar jong ka Coal India Limited (CIL) bad ka Meghalaya State Pollution Control Board (MSPCB), ki la ong. Nalor kata, la bthah ïa ka MSPCB ban register case pyshah ïa ka jingpynlang thup ïa u dewïong kaba long kum ka jingpynkheiñ ïa ka aiñ ban ïada na ka jingjaboh ka lyer bad ki um ki wah. Ka thymmei khubor ka la ïathuh ba u Justice Katakey u la dep peitngor bha ïa kane ka kam bad buh por ruh na ka bynta ban ai jubab da ka jingthah jong ka Iingbishar Supreme Court bad ka NGT. U la bthah ban lilam ïa u dewïong uba don 32 lak metric tons na baroh kawei ka jylla hapoh shi snem. Hynrei, na ka liang jong ka Sorkar Jylla ka la pan kham bun ka por da kaba ai daw ba ïa u dewïong yn hap ban kit na kiba bun ki jaka na ka bynta ban pynpoi sha ka Central Coal Depot bad kane kan kham shimpor. Ki don haduh 17-18 tylli ki Central Coal Depot ba la buh da ka tnat Mining and Geology ha East Jaiñtia Hills, ha South West Khasi Hills, ha South Garo Hills bad ha kiwei kiwei ki jaka hadien ba la ïoh jingmynjur na ka Ppollution Control Board. Kine ki cCentral Coal Depo ki dei kiba don ruh ïa ka Weighbridge. Shuh shuh ka Sorkar Jylla ka la tyrwa ban buh haduh 18 tylli ki Integrated Check Gate khnang ban peitngor ïa ka jingïaid ki trok kit dewïong. Katto katne ki Integrated Gheck Gate ki don kawei ha Umling, ha Dawki bad Dainadubi bad ïa kiba la thmu ban pyntreikam noh katba saw-san tylli ki khyrdop ki dei kiba dang hap ban pyndait ïa ka bording bad don pat ki bym pat lah ban shna na ka daw ka jingbym ïoh jaka. Ka tyllong khubor ka ïathuh ba ki don kumba 48 tylli ki jaka ba la kdew da u Katakey ba ka Sorkar kan ai jubab.