Bthah u Dy. CM ia ki DC ban buh jingkheiñ ïa ka jingwan rieh tngen ki phetwir na Manipur

Shillong, Jylliew 23 : U Symbud Myntri Rangbah ka Jylla ba khmih ïa ka Tnad kam Pohïing (Police) Bah Prestone Tynsong, mynta ka sngi Thohdieng ula pyntip ba ka Sorkar ka la dep bthah ïa baroh ki Deputy Commissioner ba kin buh jingkheiñ bha halor ka jingdon jong ki phetwir kiba wan phet rieh na Manipur sha Meghalaya.
“Ngi la dep bthah ïa baroh ki Bor District ba kin long kiba pynkhreh ban ïoh jingkheiñ ba katno ngut ki briew (Manipuri) ki la wan poi ha Jylla bad haduh katno sngi ki la don hangne bad lano ba kin leit phai biang” ong u Bah Prestone haba ïakren bad ki nongthoh khubor.
Ula pyntip ruh ba la bthah ïa ki Autonomous District Council (ADC) ba kin peitlang halor kane ka bynta bad ki ruh ki la dep pynmih ïa ki jingbthah sha baroh ki Dorbar Shnong.
U Bah Prestone ula pynpaw ba um pat don jingtip ba katto katne ngut ki briew na Manipur ki la shah pyndik hapoh ka Jylla.
“Ka Secretariat kam dei kaba jngai bad kito ki liang mamla kiba shah ktah, lada ki mad ïa kum kine ki jingeh, ka jingkhang jong ngi ka plie beit ia ki ba kin wan bad ïakynduh ïa nga lane ïa u Myntri Rangbah ne ïa ki Myntri Sorkar…ngi don beit hangne” ula ong.