Bthah u Director ïa ka PGT ban pynbun ïa ki form bad pynjlan ïa ka tarik thep form ki samla pule

By Mawphor Editor On May 28, 2023

Shillong, Jymmang 27 : U Director ka Higher & Technical Education Ambrose Ch Marak ha ka sngi Thohdieng, ula bthah ïa ka College of Teachers Education (PGT), Shillong, ban pynbun ïa ki application form bad pynjlan ïa ka sngi khatduh ban thep form na ka bynta ka jingpule B.Ed jong ka samoi 2023-2024.
Kane ka la mih hadien ba ka kynhun ka Khasi Students’ Union (KSU) ka la ïakynduh ïa u Ambrose, bad kyrpad ba un tuklar halor ka jingeh ba ïakynduh da ki samla pule, kiba kwah ban leit pule ha PGT college.
Ki Samla pule ki hap ban ïeng laiñ naduh shiteng miet tad haduh da plie ka Ophis ha ka por mynstep ban ïoh ïa ka application form hynrei watla katta kiba bun ki dang duh ïa ki form.
“Namar kane ka jingeh, ka Union kam banse ban dawa ïa ka College ban pynbun ïa ki application form na ka 500 sha ka 1000 tylli bad ruh ban pynjlan ïa ka sngi khatduh ha kaban thep ïa ki form” ong u samla Pynkmenlang Sanmiet, Education Secretary ka KSU ha ka kyrwoh.
U Director ula kular ïa ka kynhun ban bthah ïa ki bor college ba kan pynbun ïa ki application form bad ruh ban pynjlan ïa ka sngi khatduh ban thep ïa ki form” ula ong.
Ha ka shithi sha u Principal ka PGT College, u Ambrose ula ong “…..La pyntip sha ka Directorate ba ka college ka la ai tang khyndiat eh ki application form sha ki samla ba kwah pule B.Ed jong ka samoi 2023-2024. Kane kan pynduh ïa kiba bun ki samla kiba kwah ïa ka form. Halor kane, la kyrpad ïa phi ban pynbun ïa ki form bad pynjlan ïa ka sngi khatduh banthep ïa ki form”.
Ha kajuh ka por, u samla Sanmiet ula pyntip ba ka KSU ka la ai jingmut ruh ba ka College kan pyntreikam noh da ka jingpynrung klas ïa ki samla pule da kaba thep form online.
Haba ïadei bad ka eksam CUET, ula ong ba ka KSU kala dawa ïa ka Sorkar Jylla ban pynthikna ba ki samla pule na ka Jylla ki dei ban ïoh thoh ia ki eksam ha ki centre ba don hapoh ka Jylla. Kat kum ka jingong jong u, kane ka long namar ki don ki samla pule kiba hap leit ïaleh ïa ka eksam CUET sha kiwei pat ki Jylla.