Bthah u CM ïa ki ADC ban buh dulir ïa ki riti bad dustur jong ki Khasi, Jaintia bad Garo

Shillong, Nailar 9 : U Myntri Rangbah ka jylla u Conrad K Sangma u la bthah ïa baroh lai tylli ki Autonomous District Council (ADC) ba kin buh dulir (document) ïa ki riti ki dustur, kolshor, ki ktien, ki rukom hiar pateng bad rukom im jong ki jaidbynriew trai ri trai muluk ka jylla kata naduh ki Khasi, Jaintia bad Garo.
U la ong ba ka jingtip shaphang ka jinglong tynrai na kawei ka pateng sha kawei ka pateng ka dei ban ïai bteng bad ïa kane dei ban pynneh pynsah bad dei ruh ban pynshlur.
ïa kane u la pynpaw haba kren ha ka jingrakhe ïa ka International Day jong ka World Indegenous Peoples ba la pynlong da ka North East Indigenous Peoples Forum (NEIPF), Meghalaya Chapter ha Campus jongka NEHU hangne ha Shillong.
Haba pynpaw ïa ka jingsngewkhia jur ïa ka jingkloi jahrngai ki jinglong jingim tynrai jong ki trai ri trai muluk u Myntri Rangbah u la ong “ Nga kyntu lyngba kane ka Forum ba ngi dei ban buh jingthoh bad dulir bin pa bin ïa ki jinglong tynrai jong ngi. Kawei kaba ngi duna eh ka dei ka jingbuh dulir ne jingthoh ba paka ïa ki jinglong jingim tynrai jong ngi ki paid riewlum kane ka thaiñ na kata ka daw ngim da tip bniah shaphang jong ngi ngi dei kiei bad ngi wan na ei” .
U la pynpaw ba ka sorkar jylla ka la rai ban ïatrei lang ban buh jingthoh bad jingkynmaw lyngba ki dulir ba thikna shaphang ki rukom im bad rukom trei rukom ktah, kolshor bad ter ter jong ki trai ri trai muluk lyngba ki ADC.
“ Nga la bthah ïa baroh lai ki ADC kata naduh ka KHADC, JHADC bad GHADC ba kin sdang noh ban buh jingthoh bad jingkynmaw lyngba ki dulir bad ka sorkar kan ai jingïarap pisa ïa ki. Ngi kwah ba phin buh jingthoh bad jingkynmaw naduh ki jaiñ ba ngi phong, kaei ka histori ha lyndet jongki, ïa ki briew kiba la synniang sha ka kolshor jong ngi bad ter ter. Kane kam mut ban buh jingkynmaw tang ha ki kot ki sla hynrei ha kane ka pyrthei digital lah ban buh lyngba ki video, ki jingrwai khnang kine kiba dang khie dang san ruh kin sngewtynnad bad kin ym klet ïa la ka tynrai lajong.
Dei ban pynlong ruh ïa ki kynja jingïakob da ki rukom im tynrai, ki concert, ki jingtem jingput bad pynshlur ïa ki samla ba kin sngewsarong ïa la ka jong.
U la ong ba ka kam ka long kaba jwat hynrei ka kam ka dawa ba dei ban buh jingkynmaw bad ai ba ki khun samla ruh kin ïadon bynta lang halor kane ka kam.
U la ïathuh ba ka KHADC ka la wan ïakren bad da ka ktien halor kane ka kam. Ngi la ïamir jingmut da ka ktien bad shen kin sa phah da ka jingthoh khnang ba kin ïoh ban sdang noh ai ka kam. “ Nga kyrmen bad hapoh shibnai arbnai ngi la ïoh pdiang hi ïa ki jingpynkhreh na ka liang ka KHADC.
U la ong ka jingpynneh pynsah ïa ka jinglong tynrai kine ki paid riewlum kane ka thaiñ shatei lam mihngi ka long ka jingthrang jongu. “ Ki Seng Saiñ Pyrthei, ki Seng bapher bapher ki don kawei ka thong haba ïadei bad ki jaidbynriew riewlum trai ri kumno ban pynneh pynsah ïa ka jinglong tynrai jongngi”.