Shillong, Jymmang 12: U Myntri Rangbah ka Jylla Conrad Kongkal Sangma hynne ka sngi palei ula bthah ïa ka Tnad Home (Police) bad ka Tnad Social Welfare ba kin thaw bad wanrah ïa ka plan treikam kaba bniah bha hapoh ka shiphew sngi, kaban batai kumno ban ïakhun pyrshah ïa ki jingkynrei bad jingktah u droks hapoh ka Jylla.
“Ngi la bthah ïa ki (Home bad Social Welfare Department) ban wanrah ïa ka plan ba bniah bad ka kaiphod kaba bniah halor ka sienjam ba dei ban shim bad kiei ki jingtyrwa ba ki don ban tyrwa bad kiei ki jingkyrshan ba ki donkam khnang ban nang pynkhlaiñ ïa ka jingïakhun. Nga la bthah ba kin pynkhreh ïa ka kaiphid bad ban aiti sha ngi hapoh ka 10 sngi” ong u Conrad haba ïakren bad ki nongthoh khubor hadien ka jingïalang bad ki Heh Ophisar jong kine ki tnad treikam.
U Myntri Rangbah ula pyntip ba kane ka jingbthah kala mih hadien ka jingleit iuhkjat jong u ha kiba bun ki shnong ha kine ki arbnai bala leit noh ha kaba ula ïakynduh ïa ki riew rangbah jong kine ki Shnong kynthup ki Nong ïalam Shnong, kiba ju kren beit ïa ki jingktah jong u droks bad ka jingsngewkhia kaba ki don.
U Conrad u pyntip ba na ka liang ka Tnad Pulit, ka jingdonkam ba hakhmat eh kaba la pynpaw ka dei ka jingdon kam ïa bun ki kor ki bor bad ki briew khnang ba kin lah ban tehlakam ïa ka jingwan rung u droks ha kylleng ki shnong ki thaw.
“Nga la pan jingtip ruh ïa kiei ki sienjam bad ki prokram bala pyntreikam da ka Tnad Social Welfare kynthup ka jingtehlakam bad ki kam ba ïadei bad ka jingpynshai paidbah” ula ong bad bynrap “Ngi la bthah ruh ïa ki ban pynkhreh ïa ki prokram ba bniah ba kumno ki Tnad treikam, ki Rangbah Shnong bad ka imlang sahlang ki don ïa ka bynta ha kabna pynthikna ba ki jingïalap kin long kiba khlaiñ khnang ban lah pynkonguh ïa ki nongshongshnong ba kin ong Em ïa u Drugs”.
Halor ka jingdonkam ïa ki lad jingiarap ban tehlakam ïa ka jingkyrni dih droks hapdeng ki samla, u Conrad ula pyntip ba ula shong bishar halor kane ka kam bad sngew ba ka long kaba donkam ban don bun ki Rehabilitation Centre ha kylleng ki jaka kiba shah kjah jur eh ha u droks.
Haba kylli la ka sorkar ka don jingthmu ban thaw ïala ki jong ki Rehabilitation Centre, u Myntri Rangbah ula pynpaw ba u kwah ïa kine ki project ban pyntreikam da ka Public-Private Partnership (PPP) Mode.
U Conrad ula kyntu ïa ki Kynhun treimon sngewbha ba kin wan shakhmat ha kaban thaw bun ki Rehabilitation Centre haba kular ruh ba ka Sorkar ka long kaba kloi ban kyrshan ïa ki.
Hato ka Sorkar kan kynthup lang hapoh ka Megha Health Insurance Scheme (MHIS) ban ai jingsumar ïa kiba kyr ni dih droks haba buh hakhmat ïa ka jingrem dor ban phah sumar ha ki jaka sumar shimet, u Conrad ula ong “Ka Sorkar kan shimkhia ïa kane ka bynta bad kan sa shong bishar ïa kaei kaba dei ban leh”.
Kumba long mynta,ki don haduh 11,400 ngut ki nongdih droks ha Jylla Meghalaya kat kum ka kaiphod halor ka survey “Magnitude of Substance Use in India” bala pyllait ha u bnai Rymphang 2019. Ïa kane ka survey la leh da ka Ministry of Social Justice and Empowerment ha ryngkat ka jingiatreilang bad ka National Drug Dependence Treatment Centre (NDDTC lem bad ka All India Institute of Medical Sciences (AIIMS), New Delhi.
