Nongpoh, Naitung 30: U District Magistrate ka Ri-Bhoi District u la pynmih ïaka hukum ba baroh ki dukan die doh ha Ri-Bhoi District ba ki kah bad da ïaki dukan jong ki khnang ba kan nym don kano kano ka jingpyni paidbah ïaki doh ba ki die, bad la hukum ruh ba ki dei ban die tang ïaki doh ba dang ba dang shu ot, ym ki doh bala sniew ne sah.
Naka liang ka bor district kala bthah ruh ba baroh ki dukan die doh ki dei ban long kiba khuid ba suba, ban sait bad pynkhuid man ka por, ban pyndonkam da ki jaka bret ñiut kiba don jingtap bad ba kidei ban deng ïaki jingdeng kti (Gloves) bad ka jingtap khlieh (Head Gear), kaba dei ruh katkum ka Prevention of Cruelty to Animals (Regulation of Livestock Market), Rules 2017 bad ka hukum bala pynmih da ka High Court haka 14 tarik, bnai Jylliew 2022.
Namarkata naka liang ka bor district kila maham ba kino kino kiba leh pyrshah yn pynshitom katkum ki kyndon jong ka aiñ.
