Shillong, Rymphang 15: Ka tnat pule puthi jong ka sorkar jylla ka la bthah ïa ki ophisar ba kin pynlong ïa ka jingleit talasi bad jurip na ka por sha ka por ïa baroh ki skul ha ka jylla.
Haba kren sha ki lad pathai khubor u Swapnil Tembe State Project Director ka pule puthi ka jylla u la ong ba ka tnat ka la thaw ïa ka school monitoring app ka ban ïarap ïa ka tnat ban khmih bniah ïa baroh ki kam ki jam jong baroh ki skul ha ka jylla.
“Ngi pynmih ïa ki jingbthah sha baroh ki DSEO, SI, DSEO, DMC ba kin leit ban talasi bad jurip khnang ban lap la ki skul ki plie ne em, la ki nonghikai ki don em, la ka don ne em ka jingai ïa ki jingbam, la ki don ne em ki kot ki sla ki don ne em bad kumjuh ruh ki uniform skul ki don ne em,” ong u Tembe.
U Tembe u la ong ba kane ka jingbthah la dep ban phah sha ki heh ophisar khnang ba kin lah ban pynjur ïa ka jingleit jurip ka jong ki sha ki skul bapher bapher.
“Ngi la buh ruh ïa ka app kaba dei ka school monitoring app bad ngi la kyntu ïa ki ba kin pyndonkam ha ka por ba ki leit sha ki skul,” u la ong.
“Da kane ka school monitoring app, baroh ki kaiphod yn lah ban buh ha ki jingthoh, naba kaei kaba ngi shong hangne ngi lah ban ïohi ïa kaei kaba jia,” u la ong.
