Bthah ka tnad Pulit ia baroh ki SP ha Khasi bad Jaintia Hills ban tohkit halor ki kam dawa pisa ka HNLC
Shillong, Nailur 16 : Ka tnad Pulit jongka jylla ka la bthah ïa baroh ki Superintendent of Police (SP) jong ki District ha ri lum Khasi bad Jaintia ba kin tohkit halor ki kam dawa pisa ka seng Hynniewtrep National Liberation Council (HNLC) na ki nongkhaïi heh spah ha ka jylla.
Haba ïathuh ïa kane uwei u heh pulit u bym kwah ban pynpaw kyrteng ïa lade ula ïathuh “ Ngi la bthah ïa baroh ki SP ba kin tohkit bniah halor ki kam dawa pisa jongka HNLC ha baroh ki District kiba hap ha kane ka Eastern Range ne ha ri lum Khasi bad Jaintia”.
“ Tang shu la lap bad lah ban pynthikna ngin sa rejister case bad sdang ïa ka jingtohkit kaba bniah” ong une u heh pulit.
Halor ki jingkylli hato ki pulit ki la ïoh kopi ïa kine ki shithi dawa pisa ka HNLC une u heh pulit ula ïathuh “ Hooid ki don kiba ngi la shu ïoh kopi hynrei kaba eh ka long ba ym pat don mano ruhba wan ujor sha ki pulit. Na kata ka daw ngi la bthah ïa ki SP ban tohkit”.
U la ïathuh ba ngi kyntu ïaki paidbah ba kim dei ban siew pisa namar lada ki ïoh pisa kin khlaiñ biang bad kin sa thaw ki jingpynkulmar bad pynthut ïa ka suk ka saiñ jongka jylla.
U la ïathuh ruh “ Kaba ar ka long ba tang shu la tohkit bad lap ba don kiba shah dawa yn rejister case bad lada kiba shah dawa pisa ki siew ïa ka pisa la ka dei na ka jingtieng ne da kaba ki kwah hi ban siew kin sa shah pynngat ha ki kyndon aiñ kiba pyrkhing bha” ong une u heh pulit.
U la ïathuh “ Ka HNLC ka ju leh ïa ki kam dawa pisa da kaba shu phah da ka WhatsApp. Kumta lada kiba shah dawa kim wan shahmat ka long kaba eh ban tip lut mano ba shah dawa bad kumno ki leh ruh ym tip na kata ka daw ngi dang bud dien bha mynta. Ki don kiba ngi la suba bad ngi dang bud dien bha ïa ki bad tang shu tip ngin sa tohkit bniah bha ïa ki”.
U la kyntu ïa kito kiba shah dawa ba kin wan shakhmat bad pyntip sha ki bor pulit khnang ba ki pulit kin ïoh ban ïarap ïa ki namar lada kim wan bad ki leh hi ïa ka kam lada jia ei ei ruh ki pulit kim lah ban leh ei ei kumta kaba bha tam ka long ba kito kiba shah dawa kin wan beit shakhmat bad pyntip sha ki pulit namar ki pulit ruh kin ym pyntip shano shano ruh halor kata ka jingshah dawa pisa jongki.
Ha ki por mynshwa la ïoh ban kem ïa kito kiba donkti ban dawa pisa namar ki don kiba shah dawa kiba wan shakhmat bad ïatrei lang bad ki pulit hynrei ha kane ka kynti ym pat don satia mano mano ruh ba kloi ban wan shakhmat vbad pyntip sha ki pulit pynkut une u heh pulit.