Bthah ka sorkar pdeng ïa ki sorkar jylla ban pynsangeh ïa ka jingpyndonkam plastik

New Delhi, Jylliew 4 : Kum ka dak ka jingrakhe ïa ka 5 tarik u Jylliew, 2022 kum ka sngi pynneh pynsah mariang ne ka World Environment Day, ka sorkar pdeng ka la bthah ïa ki Sorkar Jylla/UT bad ki bor synshar ha kylleng ka ri kin sdang ïa ka kam ban pynsangeh noh suki pa suki ïa ka jingpyndonkam ïa ki plastik ne Single Use Plastic (SUP) .
Kane kan long kum ka jingnoh synniang na ka bynta ka mariang, kat kum ka ktien ïalap pynneh mariang “Clean and Green”. Kane ka long hadien ka jingai jingkren Mann Ki Baat kaba 89 jong u Myntri Rangbah Duh, u Narendra Modi ha ka 29 tarik u Jymmang, 2022 ha kaba u la kyntu ïa ki nongshong shnong ka ri ba kin ïatrei lang bad shim ïa ki sienjam na ka bynta ka jingkhuid bad shim bynta ruh ha ka jingthung ïa ki dieng ha ka World Environment Day,
Da ka jingïashim bynta ha ka World Environment Day ryngkat ki jingkular ban pynsangeh noh ïa ki plastic shuwa ka 30 tarik u Jylliew, 2022.
Halor kane na ka liang ka tnad Housing & Urban Affairs (HUA) ka la phah ïa ki jingbthah kiba bniah sha ki Jylla bad ki UT ba kin shim ïa katto katne ki kam ban pyndep ïa kane ka thong. Kine kin kynthup ïa ki kam pynkhuid ha kaba yn kham ban jur halor ka jinglum ïa ki niut plastic, ka jingthung ïa ki dieng ban ïashim bynta ki nongshong shnong ka ri naduh ki khynnah skul, ki kynhun trei mon sngewbha, ki SHG, ki NGO/CSO, NSS bad ki dkhot ka NCC, ki RWA, ki kynhun nongshong ïew, ki kompani bad kiwei kiwei.
Ka jingai jingmut halor ka jingpyntreikam ia ka jingpynkut ïa ka jingpyndonkam ïa ki plastic ka don shibun ki bynta ba lah ban sdang. Hapoh ka Swachh Bharat Mission – Urban 2.0, kaba pyntreikam mynta da ka MoHUA, ka jinglum, jingbret ïa ki niut plastic ha ryngkat ka jingpynduh noh ïa ki plastic ka dei ka bynta kaba kongsan.
Hapoh kane ka Mission, man ki tnad ki dei ban pynthikna ïa ka jingpynïakhlad ïa ki jait niut, bad ruh ba kin don ïa ki Material Recovery Facility (MRF) ban jied ïa ki niut ba tyrkhong (ba kynthup ïa ki plastic) khnang ban lah ban pyndonkam biang ïa kine lane ban shna ïa ki mar kiba ai jingmyntoi, kaba pynduna shisha ïa ka jingpoi ki niut plastic sha ki jaka theh niut lane ki wah bad kiwei kiwei ki jaka shong um.
Katba 2,591 tylli ki ULB (na ki 4,704 tylli) ki la ai jingtip shaphang ka jingpynduh ïa ki plastic katkum ki jingbthah jong ka Central Pollution Control Board bad ka tnat EF&CC, ki Jylla / UT ki donkam ban pynthikna ba ki 2,100 tylli ki ULB ba dang sah ki ai jingbthah halor kane shuwa ka 30 tarik u Jylliew, 2022. Ki ULB ki hap ban ithuh ïa ki jaka ba jyllei bha ki plastic bad pynduh ïa kane, ha ryngkat ka jingshim jingïarap na ki State Pollution Control Board bad ka jingthung ïa ki special enforcement squad, ka jingpynlong ïa ki jingkhynra ba syndet bad ka jingdai kuna kaba khia ïa kito kiba pynkheiñ ïa kane ka jingbthah, khnang ban pyntreikam ïa ka jingkhang ïa ki plastic.
Katkum ki kyndon PWM (Amended) Rules, 2021, ka jingshna, jingbuh, jingsam, jingdie bad jingpyndonkam ïa ki pla plastic kiba shna da ka plastic ba thymmai lane kato kaba la pyndonkam biang kiba duna ïa ka hynniew phew san micron (75 µ lane 0.075 mm ka jingrben) ka dei kaba la pynduh naduh ka 30 tarik u Nailur, 2021 ha kaba ïanujor bad kiba sanphew micron (50 µ) ba la ai jingmut mynshuwa hapoh ka PWM Rules, 2016. Namar kane, la pynshlur ïa ki briew ba kin sangeh ban pyndonkam ïa ki pla plastic ba ai da ki nongdie jingdie, ki dukan, ki nongdie jhur bad kiwei kiwei bad ruh ba kin shim pat da kiwei kiwei ki lad.
Ha kaba ïahap bad ki kyndon PWM (Amended) Rules, 2021 yn shim ïa ki sienjam bapher bapher ban pynkhlaiñ ïa ka jingpyntreikam. Ki ULB kin donkam ban wad ïa ki lad ban bujli ïa ki pla plastic (kum ki pla jaiñ / jute / ki proh ki shamoit kiba lah ban pynum ha ryngkat kiwei kiwei) kiba la don lypa ha ki ïew bad ban pynsaphriang jingtip shaphang kine ki lad. Lah ban kyntu ïa ki kompani shna umsoh bad ki um ba kin seng ïa ki bottle bank (ha kaba ki briew ki lah ban ïoh jingsiew haba ki wanrah ïa ki bilor plastic ba thylli), bad ruh ba kin seng ïa ki jaka ai ïa ki bilor plastic ba la pyndonkam ha ki jaka bapher bapher, kum shi bynta jong ki kam Extended Producers’ Responsibility (EPR) jong ki. Lah ban pynkhlaiñ ïa kine ki sienjam lyngba ki ‘swachhata rath’ ki ban don ha baroh ki jaka paidbah, ki ïew lane ki jaka ba bun briew ba kin ai jingtip shaphang ka jingkiar ïa ki plastic bad ka jingpdiang ïa kiwei kiwei ki lad kiba lait na ki plastic.
La ai jingmut ïa ki jylla bad ki ULB ba kin ïasnoh kti bad ki karkhana dewbilat lane kiwei kiwei ki karkhana ban pynthikna ba katto katne ki niut plastic ki kylla sha ki tyllong pynmih bording na ka bynta kine ki karkhana lane ka jingpyndonkam ïa kine ki niut plastic ban shna surok. Na ka bynta ka jingshna ïa ki surok, ki ULB lane ki tnat Public Works Department jong ki kin donkam ban saiñdur ïa ki kyndon treikam ban pyndonkam ïa ki ki plastic ba kham rben ha ka jingshna surok.
Shuh shuh, kane ka jingbthah ka ban jur halor ka jingïashim bynta ki briew, ha kaba lah ban jied ïa ki nongmihkhmat kum ki Mayor bad ki ward councillor, ki kynhun trei mon sngewbha, ki NGO / CSO, ki kynhun na ka bynta ka bha ka miat ki nongshong shnong, ki kynhun nongshong ïew, ki self-help group, ki khynnah pule bad ki kynhun jong ki samla ba kin ïarap ha ka kam ai jingtip shaphang ka jingpakhang ïa ki plastic bad ka jingpyntreikam ïa kane. Ki ULB ki lah ruh ban pynshlur ïa ki briew ba kin shim smai ban ym bret pathar ïa ki plastic bad ban ïada na ka jingpoi ki plastic sha ki jaka theh niut, ha ryngkat ki prokram ai khusnam ban pynshlur ïa ki rukom bret niut kiba bha lyngba ki lad pathai khubor lane ki rynsan ha ka imlang sahlang ban pynshlur ïa kiwi kiwei ba kin sangeh ban pyndonkam ïa ki plastic.
Ki Jylla / UT bad ULB ki dei ban buh jingtip shaphang baroh kine ki sienjam lyngba ki kyndon treikam ban lum jingtip bad ai jingtip khnang ba yn lah ban buddien ia ki kam ha ki kyrdan ba kham halor.
Ka Swachh Bharat Mission – Urban, ba dang pyntreikam da ka tnat HUA, ka kut jingmut ban wanrah ia ki nongbah ba lait na ka jingbret niut pathar lyngba ki sienjam na ka bynta ka jingpynkhuid ia ki niut ha baroh ki nongbah jong ka ri.