Shillong, Jylliew 07: Ka sorkar pdeng lyngba ka tnad Ministry of Rural Development, ka la bthah ïa ki paidbah nongshong shnong jong ka ri India ban sieh ïa ki lama jong ka ri kum ka dak ka jingrakhe ïa ka jingdap 75 snem jong ka jinglaitluid ka ri India.
Katkum ka jingbthah ba la pynsaphriang na ki ophis jong ki C&RD Block, la ong ba ïa ki lama dei ban wah naduh kaba sdang jong u bnai Naitung mynta ka snem haduh ka 15 tarik u Nailar 2022, kaba dei ka sngi ban pynkut ïa ka jingrakhe dap 75 snem jong ka jinglaitluid.
Ka Block ka la bthah lyngba ki Sordar Shnong bad kumjuh ruh ki VEC ba kin bthah ia ki paidbah ban wah ïa ka lama jong ka ri kum ka dak ban pynpaw ïa ka mynsiem ieit ri. La bthah ruh ba ïa ki jinglut jingsep yn tip hi da ki Shnong lane lada don ki riew shimet kiba kloi ban bei pisa na ka bynta kane, ki lah ban leh ïa kata, la ong ka jingbthah na ka tnad jong ka sorkar pdeng.
