Shillong, Jymmang 27 : Ka sorkar ka la bthah ïa baroh ki tnad treikam jongka ba ki dei ban pyntreikam kloi noh ïa ki jingbthah bad hukum jongka ïing bishar Supreme Court (SC) bad National Green Tribunal (NGT) ha kaba ïadei bad ka kam tih bad khaïi dewiong ha kane ka jylla.
“ Ngi la shim khia bha ïa ane ka kam bad ki tnad treikam mynta ki la pynkhreh ba baroh ki jingbthah bad ki hukum jong kitei ki ïing bishar dei ban pyntreikam noh mardor. Hooid baroh shi katta ki don kiba la pyntreikam bad ki don pat kiba dang sahteng hynrei mynta la bthah ba dei ban pyntreikam lut ïa baroh”: ong u Myntri Rangbah ka jylla u Conrad K Sangma haba kren sha ki lad pathai khubor mynta ka janmiet.
U la kren ïa kane halor ka jingkylli kumno ka sorkar ka leh halor ka kaiphod ba la ai da u Justice BP Katakey hakhmat ka ïing bishar High Court kaba la pynpaw ba ka sorkar ka khlem pyntreikam lut ïa ki hukum bad jingbthah jong ka ïing bishar SC bad NGT ha ka jylla.
U la ong “Ki la don bun kiba pyntreikam bad ki dang don ruh kiba ym lah ban pyntreikam ha ka por bad mynta ngi dang pynkhreh ban pyntreikam lut nadong shadong khamtam ha kaba ïadei bad ki kor ki bor technology”.
Ka kaiphod ba 41 slam kaba la ai sha ka ïing bishar ha ka 23.5.2022 ka kdew shai ba lait noh tang ka jingpynbna ïa ka Meghalaya Minerals (Prevention of Illegal Mining, Transportation and Storage) Rules 2022 kata ha ka 24 tarik Lber 2022 ia kiwei ki jingbthah bad hukum ym shym la pyntreikam satia.
ïa u Justice BP Katakey la thung da ka ïing bishar HC hi ban khlieh ïa ka Committee ka ban bud dien la ka sorkar ka pyntreikam hok ne em ïa ki hukum ka SC bad NGT bad hadien ba la ïoh ia ka kaiphod bad lap ba kam don satia ka jingpyntreikam mynta ka la thung ïa u ba un dang long u nongpeitngor bad bud dien ïa kine ki hukum ha kaba ka sorkar kan hap ban bei lut nadong shadong ïa ki jinglut jingsep na ka bynta jongu.
