Bthah ka sorkar ïa ka UA bad Municipal ban wad lad kyrkieh na ka bynta ki ñiut ha Jowai

Shillong, Ïaiong 19 : Ka sorkar jylla ka la bthah ïa ki tnad ba dei peit ba kin wad lad kyrkieh na ka bynta ban pynbeit noh ïa ka rukom bret ñiut kaba la ktah bha ïa ki nongshong shnong ka Jowai, kaba dei ruh ka headquarter jong ka West Jaiñtia Hills.
Katei ka jingbthah ka wan hadien ba ka sorkar jylla kam shym la ïoh jaka satia ban buh ïa ka jaka bret ñiut watla ka tyrwa ban siew da ka dor kaba heh bha sha ki trai jaka.
“Ngi la bthah ïa ka Municipal Board, ki bor distrik bad ruh ïa ka Urban Affairs ba kin wad lad kyrkieh shipor,” ong u Bah Prestone haba kren bad ki lad pathai khubor.
Shuh shuh u ong ruh ba ki sngewkhia haduh katta katta ban ïohi ba la shu ieh kumto ïa ki jaboh khlem lum shuh la bun bun bnai kaba la pynlong ïa ki nongshong shnong ban sah ha ka jingeh kaba khraw.
Da kaba kdew ba ka jingeh hi kadei ka daw tynrai, u Symbud Myntri Rangbah u la ong ba don ki khep ba wat haba ki ïoh ïa ka jaka lada ym dei ka shnong hynrei don ruh ba ki trai jaka kim kwah satia ban ai ïa ka jaka bad kane hi ka ktah ym tang ha rilum Jaintia hynrei wat ha Shillong ruh kumjuh.
Katkum ka jingong jong u, dei na kane ka dawe kaba pynsahteng ïa ka jingthmu jong ka sorkar ban pyntreikam noh da ki buit ka juk stad mynta ban pynlwit ïa kitei ki jaboh.
“Kumta, nga kyrpad ïa baroh kiba donbynta lang ba kin ïa trei lang bad ngi ban wad ki lad ki lynti kumno ba ngin lah ban ïoh ïa ka jaka ba ngin lah pat ban leit bret ïa kitei ki jaboh,” u la bynrap biang.
U Bah Prestone u ong ruh ba ki paidbah kim dei satia ban kynnoh ïa ka sorkar jylla hynrei ki dei ruh ban shim lang ïa ka jingkitkhlieh ban ïakhun ïa kane ka ishu.