Shillong, Jylliew, 18: Ka Sorkar Jylla ka la bthah ïa ka tnat PWD (Roads) bad ïa ka National Highway Authority of India (NHAI) ban wad ïa ki surok ba la pynjulor na ka jingtwa khyndew ha ki saw bynta jong ka surokbah National Highway-6 ha East Jaiñtia Hills District.
Ki kali heh ki la sahkut haduh mynta ha shilynter ka surokbah NH-6 hadien ba ym shym la shah ba kin ïaid hadien ba ka surok ha Lumshnong ka la pei thliew ha ka step sngi Palei.
U Myntri ka tnat Kam Pohing u Bah Lahkmen Rymbui,uba khlieh ïa ka Regional Committee ban peit ïa ka jinglong jingman na ka daw ka jingther jong u lapbah uba jur ha East bad West Jaiñtia Hills ula ong ba ki saw bynta jong ka surokbah NH-6 ki dei kiba la donkam ban maramot noh mardor da ka jingpeitngor jong ki bor synshar District.
Ki bynta jong ka surok kiba la dei ban maramot noh mardor ki long ha Umkiang, ha Kuliang bad ha Ratacherra, ha kaba ki don ki jaka ba ka surok ka la sniew bad kiba la sdang ban pei thliew bad kiba lah ban buh jingma ïa ki nongïaid lynti.
“Ngi la bthah ïa u Chief Engineer jong ka PWD (Roads) bad ki ophisar ka NHAI ba kin shimkhia halor kane ka kam,” ong u Bah Rymbui.
U Myntri ka tnat Kam Pohiing u la ïathuh ruh ba ka tnat PWD (R) bad ki ophisar ka NHAI ki la pynlong ka jingsorjamin ïa ki jaka ba la shah ktah jong ka surok bad ïathuh ruh ba ka jingmaramot ïa ka surok ka la sdang shaid shaid.
“Baroh ki tiar kiba donkam ban shna noh shipor ïa ka surok ki la poi bad ka NHAI kan sa pyrshang ban maramot noh mardor khnang ba ki kali kin ïoh ïaid noh,” u la ong bad bynrap ba ka jingshna ïa ka surok kan kham shimpor na ka daw ka jingjur jong u slap..
U la pyntip ba ki nongshong shnong ki la pyrshang ban kdat lynti ïa ka um kaba lyngkien hapdeng surok khnang ba yn dup lah ban sdang noh kham kloi ïa ka kam.
U la ïathuh ba ïa mynta ïa ki kali ri la pynbeit ba kin ïad na ka surok lyngba ka Star Cement khnang ban weng ïa ka jingeh ba la mad da ki nongleit jingleit.
“Nga sngewkmen ba ki bor synshar District, ki bor pynïaid ka Star Cement bad ka Kyrmen Foundation bad kiwei kiwei ki kynhun ki la mih shakhmat ban ïarap ïa ki nongleit jingleit kiba la sahkut hapdeng surok,” u la ong.
Ïa mynta ka tnat Pulit ka la phah 25 ngut ki Pulit langrut ban ïarap pynïaid lem ïa ki kali bad lada don kino kino ki jingjia kiba lah ban mih ha kano kano ka por.
Shuh shuh u la ong ba ka jingjulor jong kane ka surok ka la ktah bha ym tang ïa ki paidbah jong ka Jylla hynrei wat ïa ki paidbah jong ki jylla ba marjan kum ka Assam, ka Mizoram bad ka Tripura
Ha ka sngi Palei, u Bah Rymbui da lade hi u la hiar jurip sha Lumshnong ryngkat bad u MLA u Bah Shitlang Pale bad pynlong ruh ka jingïalang bad ki bor synshar District khnang ban weng noh ïa ka jingeh kaba ki paidbah ki la mad.
Lah ban kdew hangne ba ha kine ki khyndiat sngi kiba la jur bha u slap, kiba bun ki surok, kynthup ïa ki surok National Highwsay bad ki surok Shnong ki la taw bad dkut ha kylleng kylleng ki jaka bad kane ka jingtwa, ka la pynthut ïa ka leit ka wan ki paidbah, kumba la jia ha ka surok Lumshnong bad kiwei kiwei de ki jaka jong ka jylla.
