Bthah ka NGT ïa ka Sorkar Jylla ban lum ïa ka kuna ba 5.05 klur na ki karkhana Coke beaiñ

By Mawphor Editor On Jul 10, 2022

Shillong, Naitung 9 : Ka National Green Tribunal (NGT) Eastern Zone Bench ka la bthah ïa baroh 31 tylli ki karkhana Coke beaiñ ha East Jaintia Hills ba kin siew ïa ka kuna ba 5,05,20,000 klur tygnka sha ka sorkar Meghalaya namar ki khlem ïoh jingbit ei ei ruh em na ka Meghalaya State Pollution Control Board (MSPCB) ban seng ïa kitei ki karkhana.
Kane ka kuna ka long kum ka jingpynshitom namar ka jingpynjaboh tdem ïa ka mariang. Halor kane ka ïing bishar NGT ka la bthah ruh ia ka sorkar jylla ba kan pynkhreh ia ki kyndon pyrshah ïa kitei ki karkhana beaiñ kiba la seng shwa u 2021 hapoh saw bnai.
“ Ngi la bthah ïa ka sorkar Meghalaya ba kan pynkhreh ïa ki kyndon ban pynngat ïa kitei baroh ki karkhana ba la seng beaiñ khlem da ïoh jingbit bad ïa kine ki kyndon aiñ dei ban pyndep hapoh saw bnai” ong u B Amit Sthalekar uba dei u Judicial Member bad Saibal Dasgupta u riewshemphang aiñ ha ka hukum ba ki la pynmih.
Ka NGT ka la bthah ruh ïa ka MSPCB ba kan ïai peitngor ïaki karkhana Coke bad ban leit talasi banl ap la ki bud pyrkhing ne em ïaki kyndon aiñ ban ïada mariang lada lap ba ki pynkheiñ dei ban pynngat ïa ki ha ki kyndon aiñ ba pyrkhing.
Na ka liang ka MSPCB ha ka affidavit ba la ai sha ka NGT ka la pynpaw ba ka la dep ban pynlong ka jingleit jurip ba kyndit kyndit sha kitei ki 31 tylli ki karkhana beaiñ bad dei halor kane ruh ba la ai ka jingujor sha ka East Jaintia District Court.
La pyntip ruh sha ka NGT ba la jan dep ki jingpynkhreh kyndon ban pynjari ha kitei ki 31 tylli ki karkhana beaiñ kiba la seng khlem da ïoh jingbit bad khlem ki kot ki sla kiba biang bad khamtam kito ki karkhana kiba khlem khang hynrei kiba ïai plie bad treikam beit wat hadien ba la phah khang ïa ki ruh.ïa ki 12 tylli pat kiba la seng ryngkat ki kot ki sla kiba biang ka sorkar kan ym pynsaja ïa ki.
Kat kum ki kyndon ia kine ki karkhana beaiñ dei ban seng ha ka jaka kaba jngai 1 km na ki shnong, ki hospital, ki skul , ki jaka jngohkai bad 100 meter na ki wah bad kawei ka karkhana sha kawei ki dei ban ïa jngai kumba 3 km.
Kine ki karkhana beaiñ kiba hap ban siew kuna ki long ka M/s Sauryansi Coke bad hap ban siew Rs.25, 90, 000/- , M/s Safari Coke Rs.3, 70, 000/- ,M/s SD Coke Indus Rs.30, 70, 000/-, M/s Royale Born Associate Coke , Rs.29,90,000/- ,M/s R.S Petro Rs.29, 90, 000/- , M/s Presidium Breez, M/s Umthe Carbon, M/s Hynniewtrep Fuels, M/s S.S Coke, M/s Shree Jii Carbon bad M/s MM Minerals Rs. mar 10, 000/-, M/s Meghalaya Minerals Rs.51,70,000/- , M/s Meghalaya Coke (Chimney-II), M/s Kamakhya Carbide Pvt. Ltd, M/s SK Coke Industry bad M/s SM Coke mar Rs.8,20,000/, M/s Megha Coke bad Ms Malang Coke w mar Rs.29, 90,000/- , M/s Magic Coke Rs.19, 90, 000/-, M/s JMK Coke Industries Pvt. Ltd. Rs.23,50,000/- , M/s Jaintia Coke Industries (Chimney-II) Rs.30,70,000/- ,M/s HMP Coke Rs.25,90,000/- M/s Halari Coke Rs.4, 10, 000/- , M/s East Jaintia Coke, Rs.30, 70, 000/- , M/s Druk Fuels Limited Rs.30, 00, 000/- , M/s DK Coke bad M/s SSS Coke Industries mar Rs.29,90,000/- , M/s Barbarik Coke Industry Rs.8,20,000/- ,M/s Vivan Associate bad M/s Sutnga Fuels mar Rs.3,70,000/-.