Bthah ka NCPCR ïa ki lad pathai khubor, da husiar haba pathai ïa ki Case ki khynnah rit

Shillong, Lber, 29: Ka National Commission for Protection of Child Rights (NCPCR) ka la pynsngewthuh sha ki lad pathai khubor ba ki dei ban long kiba phikir bad kiba husiar bha haba pathai jingtip halor ki jingjia shah thombor jong ki khynnah kiba dang hapoh 18 snem ka rta.
Ban pynsngewthuh kham bha halor ka aiñ Prevention of Child from Sexual abuse (POCS0), 2012, hapoh ka Section 74 jong ka Juvenile Justice (Care and Protection of Children) Act, 2015 bad hapoh ka Section 228 A (1) jong ka Indian Penal Code ( IPC),1860, ka NCPCR ka la lum lang ïa baroh ki nongthoh khubor jong ka thaiñ Shatei Lammihngi kiba kynthup na ka jylla Meghalaya, Sikkim, Manipur, Tripura bad Assam ha ka jingïathir nia kaba la long ha Pine Wood Hotel, Shillong.
Ïa kane ka jingai jingpynshai halor kine ki aiñ, la ai jingkyrshan ruh da ka Meghalaya State Commission for Protection of Child Rights (MSCPCR) bad ka Seva Bharati Purbanchal (SBP).
Ka Chairperson jong ka MSCPCR, ka Kong Ïamon M Syiem haba kren ha kane ka sngi, ka la ong, ‘kane ka jingai jingpynshai sha ki lad pathai khubor kan ïarap ban ïada ïa ka hok jong ki khynnah rit. Kum kine ki jingïalang ki dei ban bteng nangne shakhmat.”
Ka Kong Syiem ka la pdiang ïa ka bynta ba ki lad pathai khubor ki long kum ki nongïada ïa ki hok jong ki briew. Ka la ong ruh ba ki lad pathai khubor ki don ka bynta kaba khraw ban pyni ïa ki jingduna ha ki kam ba pyntrei na ka bynta ka jingïada ïa ki khynnah. “Ki lad pathai khubor ki la pyntip ruh shaphang ki jingjia bapher bapher bad kane ka ïarap ïa ka NCPCR ba kan shim ïa ki sienjam haba don kano kano ka jingshah iuhroit ïa ka hok jong ki khynnah,” ka la ong.
Ha ka Technical Session, u riewshemphang na ka NCPCR, u Paresh Shah u la kren shaphang ki aiñ bapher bapher kiba ïada ïa ka hok jong ki khynnah rit. U la kren shaphang ki bynta kiba ïada ïa ka kyrteng jong ki khynnah bad ka bynta jong ki lad pathai khubor ban ïada ïa ki hok jong ki khynnah. U la ong ba ki bynta bapher bapher jong ki hok jong ki khynnah ki don hapoh ka jingïada jong ki aiñ ka ri.
U Paresh Shah u la kren ïa ki kyndon hapoh ka Indian Penal Code (IPC) na ka bynta ka jingïada ïa ka hok jong ki khynnah.
Haba pdiang ïa ka bynta jong ki lad pathai khubor ha ka jingïada ïa ki hok jong ki khynnah ha kane ka ri, u Shah u la ong, “phi dei ban long kiba husiar haba pathai ïa ki khubor jingtip shaphang ki jingjia kiba ïadei bad ki khynnah rit khamtam ha kaba kine ki don jingïadei bad ka jingshah leh be-ijot jong ki khynnah rit, ka jingpynmih kyrteng ïa kum kine ki khynnah bad ki kam ba ïadei bad kane.”
U la kdew sha ki bynta jong ka Prevention of Child from Sexual abuse (POCS0), 2012, hapoh ka section 74 jong ka Juvenile Justice (Care and Protection of Children) Act, 2015 bad hapoh ka section 228 A (1) jong ka Indian Penal Code ( IPC),1860. U la ong ba ka jingpynmih kyrteng jong ki khynnah kiba la khlad noh ruh ka long kaba lah ban shah pynshitom hapoh ka section 74 (1) jong ka JJ Act, 2015.
U Shah u la ong ba ki bor bapher bapher ha ka ri ki la wanrah ïa ki kyndon bad ki jingbatai kiba ïarap ïa ki lad pathai khubor ba kin ai jingtip shaphang ki hok jong ki khynnah ha ka rukom kaba dei. U la ong ba ki nongthoh khubor ki ju pyni ïa ki jingeh jong ki khynnah kiba don ha ki jingjynjar namar ka apot jong ki lane ka jingshah leh beiñ ha ki riew rangbah.
“Hynrei ka long ruh kaba donkam ban peit ïa ka ‘bynta jong ki khynnah’ ha ki khubor kiba kham shyrkhei bad ruh ha ki Serial ba pyni ha Television, u la ong.
“Kito kiba thoh ïa ka Script ki dei ban kynmaw ba hapoh ka hok ban kren ïa kaba ngi sngew, haba ngi thoh shaphang ki khynnah, ngi dei ban pyndonkam ïa kane ka hok da ka jinghusiar namar ka jingim jong ki khynnah ki don ha ka kti jong ki. Ki khubor ki dei ban long kiba ai jingtip bad kiba kiar na ka jingpynshyrkhei. Ki khynnah ki dei ban long ka bynta kaba kongsan na ka bynta ki lad pathai khubor bad ym dei ban shim kabu ïa ka ka jingluilui jong ki,” u la ong.
U la ong shuh shuh ba ki nongthoh khubor kiba sngewthuh ïa ka jingktah jong ki khubor jong ki, ki sngewthuh ïa kane ka jingluilui jong ki khynnah bad ki ngeit ha ka jingthoh ïa ka khubor kaba dei bad ki burom ruh ïa ki hok jong ki khynnah bad kumta ki dei shisha kita ki nongïada ïa ki hok jong ki khynnah.
Ka DCPO jong ka tnat Social Welfare, ka Kong M.L Warjri ka la kren shaphang ka jingktah ïa ka jingmut jingpyrkhat jong ki khynnah kiba shah leh beiñ bad ka la ong ba ka jingthoh ïa ki khubor shaphang kum kine ki jingjia ka lah ban don ka jingktah kaba shi rta ïa ka jingmut jingpyrkhat bad ka burom jong kine ki khynnah.
Ka la ong ba ka jingkheiñ sting jong ki nongthoh khubor ïa kane ka lah ban wanrah shibun ki jingeh ïa kum kine ki khynnah.
“Ka burom bad ka jingheh jingsan jong ki khynnah ka long kaba kongsan bad dei bad ïada ïa kane man ka por haba thoh khubor lane pynmih prokram shaphang ki khynnah,” ka la bynrap.