Bthah ka MSPB ïa ka NHIDCL ban pyndep kloi ïa ka surok 4 lane na Umshyrpi shaduh 7 mer

Shillong, Nailar 19: Ka Meghalaya State Planning Board (MSPB) ka la bthah ïa ka National Highways and Infrastructure Development Corporation Limited (NHIDCL) bad ïa ki contractor ban pynsted ïa ka kam ban pyndep ïa ka surok four-lane na Umshyrpi shaduh 7 mer, Upper Shillong. Kane ka surok ka dei shi bynta jong ka Shillong-Dawki road project.
Ïa kane la bthah ha ka sngi baar ha ka jingleit jurip ba la pynlong da u Chariman ka MSPB u Bah Metbah Lyngdoh, ba la synranlang da ki dkhot ka board bad ki ophisar na ka tnat PWD bad NHIDCL.
Haba kren sha ki lad pathai khubor hadien ka jingjurip u Bah Lyngdoh u la pynpaw ka jingsngewkhia halor ka jingslem ka jingpyntrei ïa kane ka project, ha kane ka la wanrah ka jingeh ïa ki paidbah kiba ïaid na kane ka surok manla ka sngi, khamtam kito kiba na West Khasi Hills, South West Khasi Hills, Eastern West Khasi Hills, bad ki bynta jong ka East Khasi Hills.
“Ki paidbah ki mad ka jingeh kaba khraw bha haba ki ïaid ne ki leit ki wan na 7 mer, Upper Shillong shaduh Anjalee petrol pump naba ka shim por kumba 1 – 2 ar kynta. Ngi sngew ba kane ka dei ka kam kaba sngewkhia naba ki briew ki hap ban pynlut bun ka por ban ïaid na kane ka surok khamtam ha ki por ba donkam kyrkieh,” u la ong da kaba bynrap, “Nga ruh nga ju ïaid na kane ka surok manla ka sngi ban leit sha Mairang bad nga ruh nga mad ïa kane ka juh ka jingeh ban poi sha ka jaka kaba nga thmu ban leit.”
Halor ka jingslem ban pyndep ïa ka bypass ha 3 mer, Upper Shillong, u la ïathuh ba lyngba kane ka jingjurip ki contractor ki la pynpaw ba ki mad ïa ki jingeh, ba kynthup ka jingpynkynriah ïa ki pipe, ha kaba kane kan shim por ïa ki sa kumba 2 bnai ban pynbeit ïa kane ka jingeh.
“Ki contractor ki la pynthikna ba kin pyndep ïa ka bypass hapoh ka 2 bnai bad ban ïoh shah ban ïaid noh ki kali,” ong u Bah Lyngdoh.
U chairman jong ka board u la ïathuh ruh ba ka jingpyntrei ïa ki katto katne ki kynroh kam long katkum kaba la khmih lynti.
“Khamtam ka kynroh ne retaining wall hajan ka jingkieng Umshyrpi kam da long kaba bha, ha kaba kane ka pynpaw ïa ka jingsngewkhia halor ka technical. Ki ophisar ka PWD ki la dep ïakren ïa kane ka kam bad ki contractor bad ka NHIDCL,” u la bynrap.
La ong ba ïa kane ka project la buh thong ban pyndep ha u Nohprah mynta u snem. Ka MSPB ka la kyntu ïa ka NHIDCL ban aiti ïa ka por jong ka jingpyndep ïa kane ka kam, da kaba banjur ïa ka jingdonkam ban pyndep ha ka por kaba biang khnang ban pynlait noh ïa ki jingeh ba mad da ki paidbah manla ka sngi kiba ïaid ba ïeng na kane ka surok.
“Ngi la banjur ba ïa kane ka project dei ban pyndep kham kloi katba lah naba ka la wanrah palat ka jingeh ïa ki paidbah ka jylla manla ka sngi,” ïathuh u Bah Lyngdoh.